“‘Kim’ cuenta la historia d’amistá ente dos persones mui contraries ente sí”, apunta Antuña

El cuartu títulu de Calume d’esti 2022 y el séptimu d’esta coleición d’Ediciones Trabe ye ‘Kim’ del británicu nacíu na India colonial y Nobel de Lliteratura del 1907, Rudyard Kipling. “Cuenta la historia d’amistá ente dos persones mui contraries ente sí”, señala Eloy Antuña, encargáu de la vesión asturiana que presenta esti miércoles n’Uviéu.

“Ye una historia bien guapa, clásica, interesante”, esplica sobre esti llibru “de picaresca, espíes, aventures...” que, anque haya quién lu vea como un títulu empobináu pa un públicu más xuvenil encaxa pa un llector adultu. Nella Kipling rellata la vida de Kim, un güerfanu irlandés que se convierte en discípilu d’un lama que, al empar, ye espía de la intelixencia británcia.

“Cuenta la historia d’amistá ente dos persones mui contraries ente sí. Ye de llectura mui fácil y con pulsu narrativu. Sabe a la India colonial”, resume Antuña sobre un llibru asoleyáu nel 1901 que se desendolca na actual Pakistán, naquel momentu baxu dominiu británicu. El gustu del autor pa col colonialismu y l’Imperiu nun falta en ‘Kim’, que se pue ver en detalles como, por exemplu, “el paternalismu que se muestra pa coles figures orientales –que, sicasí, salen meyor paraes que les occidentales–”, apunta’l traductor, y fai “imposible lleelu ensin conflictu”, pero nun quita interés a la obra.

Sobre’l trabayu de traducción, rescampla que “foi complexa porque trata sobre’l mundu oriental, con testos llargos, sobre manera cuando fala’l lama, pero resultó mui interesante y la so llectura ye mui accesible”. La so torna de ‘Arguyu y prexuiciu’ (Universos, 2011), de Jane Austen, convenció a Rafael Rodríguez Valdés, direutor de Calume, pa confiar ‘Kim’ al llangrenu, qu’empondera l’atrevimientu d’esta coleición pa trayer obres como ésta de Kipling “que si non nun tendríamos n’asturianu”.

La primera foi '1984' de George Orwell, tornada por Xesús González Rato, a la que siguieron ‘La naranxa mecánica' d'Anthony Burgess, por José Luis Piquero; ‘La palabra final. Diariu d’un suicidiu’, de Roberta Tatafiore, por María Antonia Pedregal; y ‘Cándidu o l’optimismu’ de Voltaire, por Javier Martínez Concheso. Les trés últimes en llegar, depues del branu, foron ‘Los amigos de Bernhard’ d’Annemarie Schwarzenbach, por María García Díaz; ‘Guillem’, de Núria Cadenes, por Miguel Sánchez Canella; y ésta d’Antuña.

Actu na Llibrería Trabe

La presentación de ‘Kim’ va tener llugar esta tarde, a les 19.30 hores, na uvieína Llibrería Trabe. Na mesma Antuña va tar acompañáu por Rodríguez Valdés y la editora Esther Prieto.

Na semeya, el llibru y los artículos de promoción qu'acompañen los títulos de 'Calume', como pegatines y marcapáxines.