Karzai: “les inxerencies estranxeres" fueron un grave problema"

El presidente d'Afganistán, Hamid Karzai, inauguró'l Parlamentu esti miércoles, poniendo fin a delles selmanes de llucha política, y declaró ante los diputaos que les "inxerencies estranxeres" supunxeron un "grave problema".

Por cuenta de la gran presión exercida polos candidatos que ganaron les elecciones del pasáu 18 de setiembre, qu'amenazaren con ocupar los sos escaños esti mes de xineru con o sin Karzai, y a les crítiques formulaes pola ONU y por países qu'apoyen económicamente a Afganistán y tienen tropes esplegaes ellí, el presidente afganu finalmente accedió a inaugurar el nuevu Parlamentu.
  
Karzai retrasara un mes l'abertura del mesmu pa dexar qu'un tribunal electoral dispunxere de tiempu bastante pa investigar el supuestu fraude que se cometió nes elecciones.
  
Munchos países occidentales aplaudieron la decisión d'inaugurar yá'l Parlamentu, pero Estaos Uníos dixo que "va vixilar de cerca" los acontecimientos. Karzai, que yá acusó a países occidentales d'entrometese nes fraudulentas elecciones presidenciales que-y dieron la victoria nel 2009, afirmó que les inxerencies estranxeres nos comicios lexislativos ficieron que'l procesu fuera menos tresparente.
  
"Mientres el procesu electoral tuvimos serios problemes a la hora de protexer el votu de la xente y d'evitar el fraude, asina como poles inxerencies estranxeres", aseguró'l presidente afganu poco dempués de que los parlamentarios ocuparen los sos escaños.
  
"Debemos 'afganizar' les instituciones gubernamentales y les elecciones. Sin duda, unos comicios convocaos polos afganos van ser más tresparentes y menos caros", añadió.

Tribunal electoral especial
Estes declaraciones del mandatariu afganu paecen tener el so orixe nes crítiques que recibió por crear un tribunal electoral especial. Diplomáticos y organizaciones de Derechos Humanos cuestionaron la so llegalidá.
  
Dizse que Karzai nun ta satisfechu cola composición del nuevu Parlamentu, qu'inclúi un bloque opositor más coherente y que se fai sentir. Un diplomáticu occidental señaló que "el tribunal especial ye clave". "Creo que podemos prever que'l presidente va recurrir a lo que llama poderes llegales pa intentar echar a dellos diputaos", añadió.
 
"Va intentar facer algo, anque sólo seya por debilitar la lexitimidá del Parlamentu", agoró'l diplomáticu, que nun quier que lu identifiquen públicamente.
  
Karzai algamó que'l tribunal electoral especial se caltenga, pese a que dellos diputaos tamién consideren que ye illegal y qu'habría que desvinculalu. Esti tribunal pue quitar l'escañu a cualquier candidatu acusáu de manipular les elecciones, independientemente de si se fai o non.
  
Anque los países occidentales reconocieron que nes lexislatives hubo fraude, presionaron pa que'l Parlamentu s'inaugurara rápido y el Gobiernu se centrare en meyorar la seguridá y la gobernanza.
  
OTAN
La OTAN, que tien unos 150.000 soldaos esplegaos n'Afganistán, dixo esta selmana qu'había qu'inaugurar yá'l Parlamentu si les autoridaes afganes quieren empezar a asumir el control de la seguridá nel país en febreru o marzu. Karzai quier que nel 2014 les sos fuerces de seguridá asumieren totalmente esta responsabilidá.