K-Nalón espubliza la so primer maqueta oficial

El grupu de la cuenca'l Nalón K.Nalón ta entamando a distribuyir la so primer maqueta oficial. L'Hip hop n'asturianu que representa perfectamente esti grupu yá ta faciéndose sitiu n'Asturies, gracies al trabayu d'esti y otros grupos qu'apuesten por dicir lo que piensen a ritmu de rap y n'asturianu.

K-Nalón ta formáu por Ceeris, compositor de les bases rítmiques xera que tamién realiza en "Stoned Atmosphere", y "Tori" que s'ocupa de la parte vocal del grupu. Amás, K-Nalón acompáñase davezu nos sos directos d'Arma X (Stoned Atmosphere) y Delfo (La Tarrancha) nos coros. Asina toa esta xente, pero especialmente Tori y Ceeris, lleven trabayando dende 2003 pa iguar un estilu y un repertoriu d'hip hop n'asturianu que podemos topar nesta la so primer maqueta oficial. Ello ye que Conciencia Llibre, que se como s'entitula la maqueta, ye un encontu de los temes grabaos por K-Nalón de 2003 a 2005. La distribución de la maqueta va facela'l propiu grupu llevándola a chigres y colectivos sociales repartíos per tola xeografía asturiana. Pero amás, y siguiendo la so filosofía del intercambiu llibre, el grupu pon esta Conciencia Llibre a disposición de tol mundu na so páxina web, onde podemos descargala llíbremente.

Pero amás de la música grabada, tenemos que decatanos de que l'hip hop ye un estilu musical que tresmite muncho en directo, y los conciertos de K-Nalón conviértense gracies a la fuerza de los raperos y les bases, y dacuando a la so capacidá d'improvisacioón, nun espectáculu que paga la pena ver. Una oportunidá vamos tenela'l próximu 11 de febreru cuando, con motivu del cumpleaños de Tori, va facese un conciertu en en Sama de Llangréu onde van tocar dellos grupos d'HiP Hop asturianos, Ellí va tar xente como Stoned Atmosphere, 13 Palabras, Lego My Ego, Remote Source, Testimoniu la Viztima y por supuestu, K-Nalón, la entrada val namás que trés euros. Pa dir sintiendo de que ye lo que vien faciendo esta xente d'un tiempu a esta parte col Hip Hop n'Asturies, convidamos a los llectores a que conecten cola emisión de la canal dedicada a esti estilu musical n'Asturies.com Radio.