Juventudes Socialistas inclúi la oficialidá de la llingua ente los sos oxetivos como organización

Esta fin de selmana les Juventudes Socialistas de Asturias celebraron el so congresu, onde Unai Díaz salió escoyíu como secretariu xeneral. Les mocedaes de la FSA-PSOE van incluyir la oficialidá ente los sos oxetivos como organización.
 
Esta decisión foi destacada por Iniciativa pol Asturianu, qu’espublizó una nota pa felicitar de forma pública a les Juventudes Socialistas de Asturias (JSA) y tresmitir a esta organización el so sofitu “a esta midida qu'a la fin entrará en consonancia cola opinión d'una mayoría bien importante de la sociedá asturiana y que vien a sumase a la vindicación d'otres organizaciones polítiques que lleven años demandándola”. Coles mesmes, el coleutivu que trabaya pola normalización del idioma aprovecha pa facer un llamáu a la FSA-PSOE “pa que tomen exemplu y actúe en consecuencia al favor de los derechos llingüísticos y los intereses de los falantes d'asturianu y eonaviegu”. 
 
Por último, señala la so disposición a siguir trabayando “pa que'l consensu políticu énte la necesaria oficialidá seya cada vegada más ampliu” y anuncia que ta acabante de solicitar una reunión con Díaz pa tresllada-y les inquietúes de la organización.