Julio Sánchez Andrade presento'l so llibru sobre la percusión na música tradicional asturiana

El doctor en Musicoloxía pola Universidá d'Uviéu Julio Sánchez Andrade fizo esta mañana la presentación del llibru "La percusión en la música tradicional asturiana" obra qu'edita la Rede de Museos Asturianos y que recueye les investigaciones del autor pa ellaborar la so tésis doctoral a lo llargo de seis años de llabor que se vieron reconocíos col premiu "Marqués de Lozoya" d'investigación qu'entrega'l Ministeriu de cultura.

La obra propón una visión xeneral del campu de la percusión tradicional, apurriendo descripciones de los instrumentos, asitiamientu xeográficu, función social y técniques de construcción. Amás de presentar abondancia d'ilustraciones y semeyes, el llibru compleméntase con un DVD qu'inxerta una esbilla de pieces musicales n'audiu y videu de los mesmos informantes grabaos pol autor mientres realizaba'l trabayu de campu pa la tésis. La obra complétase cola trescripción de les partitures.