Julio Sánchez-Andrade fai tesis doctoral de la percusión na música tradicional asturiana

"La percusión en la música tradicional de la Cornisa Cantábrica: Asturias" ye'l títulu de la Tesis doctoral que presentó esta mañana na Facultá de Musicoloxía d'Uviéu Julio Sánchez-Andrade, al que muncha xente conoz por ser el percusionista col que suel actuar el grupu "Nuberu".

El yá doctor Sánchez-Andrade presentó una tesis que supón, en pallabres del xuráu, una "aportación fundamental" al conocimientu de la música asturiana, encamentando que s'espublice'l llabor, que pue suponer una obra de consulta y referencia. La tesis destaca pol gran trabayu de campu fechu, recoyendo'l llabor d'años del autor, qu'atropó cientos de testimonios de músicos tradicionales per tola xeografía asturiana. Sánchez-Andrade defende na so tesis doctoral la riqueza del patrimoniu acústicu de la música asturiana y la so vixencia actual y proyección hacia'l futuru, argumentando que la llinia de tresmisión oral ente xeneraciones d'esta música nun ta rota.
La tesis presenta la tradición de la percusión asturiana analizando tanto los instrumentos como les maneres de tocalos, una cuestión na que Sánchez Andrade, percusionista y batería especialista en bien d'estilos ye toa una autoridá, y los contestos en que s'emplega cada música. Xeográficamente, l'autor presenta l'estudiu dividíu en zones d'alcuerdu coles distintes tradiciones que detecta na percusión asturiana.


Les palabres más afalagadores por parte del tribunal vinieron del caderalgu Ángel Medina, qu'emponderó "el calter identitariu de la tesis, daqué que nun ye esplícito nin ye l'oxetivu que se buscaba pero que vien implícito en tola tesis y que m'abulta necesario".