Juaristi intégrase nel grupu europarllamentariu GUE/NGL

|
Los Pueblos Deciden, federación de partíos de la que forma parte Andecha Astur, intégrase nel grupu Izquierda Xunitaria Europea/Izquierda Verde Nórdica (GUE/NGL) del Parllamentu Européu. El so representante ye Josu Juaristi (EH Bildu).
 
En concreto, el vascu va trabayar col grupu NGL porque “caltién una posición más abierta que GUE –partíos comunistes claśicos, IX... – sobre’l drechu a decidir” y “nidia antiTroika” en materia social, apunten dende Andecha. Sicasí, tamién quier caltener una “rellaición prioritaria” con Los Verdes/Allianza Llibre Europea, del que formen parte EA y Aralar, yá que cuenta con “formaciones polítiques qu’aboguen pol derechu d’autodeterminación y sofiten el procesu de resolución n’Euskal Herria”, informen dende EH Bildu. D’igual forma, la coalición vasca quier trabayar “llinies de collaboración” ente dambos grupos p’afitar llazos y entamar reivindicaciones conxuntes en clave social.
 
GUE/NGL va contar nesta llexislatura con 52 eurodiputaos, lo que supón 17 más que na anterior. El llistáu de partíos que conformen esti grupu ye’l siguiente: AKEL (Partíu Progresista del Pueblu Obreru; Xipre), con 2; KSČM (Partíu Comunista de Čech y Moravy, República Checa), con 3; Folkebevægelsen mod EU (Movimientu Popular contra la Xunión Europea, Dinamarca), con 1; Vas (Allianza d’Izquierdes, Finlandia), con 1; Front de Gauche (Frente d’Izquierda, Estáu francés), con 4; DIE LINKE (La Izquierda, Alemaña), con 7; Die Tierschutzpartei (Partíu de la Proteición Animal, Alemaña), con 1; ΣΥΡΙΖΑ (Coalición de la Izquierda Radical conocía pol so acrónimu SYRIZA, Grecia), con 6; Sinn Féin (Nosotros, Éire), con 4, ún d’ellos por Irlanda del Norte (Reinu Xuníu); l’independiente Luke Ming Flanagan (Éire); L'altra Europa con Tsipras (La otra Europa con Tsipras, Italia), con 3; SP (Partíu Socialista, Países Baxos), con 2; Partij voor de Dieren (Partíu de los Animales, Países Baxos), con 1; PCP (Partíu Comunista de Portugal), con 3; Bloco Esquerda (Bloque d’Izquierda, Portugal), con 1; Vänsterpartiet (Partíu d’Izquierda, Suecia), con; Izquierda Plural, con 5 –l’otru eurodiputáu de la coalición va pal grupu de  Los Verdes/Allianza Llibre Europea–; Podemos, con 5; y Los Pueblos Deciden, con 1.
 
Na semeya, Juaristi xunto con Gabi Zimmer, presidenta de GUE-NGL, y Sanna Lepola, secretaria xeneral de NGL.
 
 
Contador Estadistiques