Juan Cueto diz que la TV va ser un "factor industrial"

El preste al nomamientu de José Ramón Perez Ornia como director de la futura TV autonómica foi'l puntu central de la primer reunión ayeri del Conseyu de Comunicación del Ente de la futura RTVAS, que preside Juan Cueto

L'ex - presidente de Canal + emponderó la importancia de la TV autonómica porque va ser un mediu que va aportar a Asturies un "factor industrial" que va traer beneficios, ello arriendes de ser un mediu de comunicación que va asitiar a Asturies nel mundu de la comunicación global. El periodista y autor de llibros como "exterior noche" refugó facer declaraciones sobre cuál había ser el modelu de la TV autonómica, queriendo más esperar a conocer les intenciones de Perez Ornia, periodista natural del conceyu de Siero y ex - director de Telemadrid que ye la persona propuesta pa ocupar la dirección de la TV. Sicasí, Cueto esplicó que la TV ha ser un modelu polos conteníos y pola calidá técnica y adelantó que l'ente ha respetar y atender a la pluralidá territorial d'Asturies, ayudando a vertebrala.

El Conseyu de comunicación del ente fórmenlu 13 persones, una en representación de la Universidá d'Uviéu, de les asociaciones de consumidores, el Conseyu Escolar del Principáu y les asociaciones de consumidores. La patronal asturiana FADE tien dos representantes, mientres que los conceyos asturianos tienen trés representantes, col alcalde de L.lena Hugo Alfonso Morán al frente y el Principáu ye l'organismu con más representantes, cuatro en total, ente los que rescampla la presencia del mesmu Juan Cueto