José Antonio Quirós prepara película nueva ambientada n'Asturies

El director de cine asturianu José Antonio Quirós prepara estos díes la que va ser la so segunda película "Cenizas del cielo" que va llegar siete años dempués de "Pídele Cuentas al Rey. Lo mesmo que nel so trabayu anterior, nel qu'un mineru ensin trabayu protestaba pola so situación, esta película nueva va tratar un tema rellacionau cola vida n'Asturies del nuestru tiempu. Ello ye que los protagonistes de "Cenizas del Cielo" conviven con una central térmica nel so pueblu.

La productora catalana Bausan Films va ser la responsable d'esta "comedia naturalista" ambientada nel imaxinariu "Valle Negrón" onde llega'l periodista inglés Paul Ferguson, especialista en guíes turístiques y que namás conoz d'Asturies que tien una princesa y un pilotu de Fórmula 1. Anque l'inglés cuenta con andar pelos conceyos de la costa y ver monumentos, una avería déxalu allancáu al llau de la central térmica que marca la vida de los protagonistes, encabezaos por Federico, un home de sesenta años que lleva tiempu lluchando contra la contaminación de la térmica, y que s'enfota en que'l Protocolu de Kyoto va obligar a pesllala, anque la empresa eléctrica tien planes p'ampliar la central. La trama d'intereses, col periodista inglés de testigu, queda asina preparada.

La empresa productora cuenta con entamar el rodaxe de la cinta pal primer trimestre del 2007. Ente los protagonistes va tar l'actor Celso Bugallo, anque nun se sabe'l restu del repartu.