Jorge Rivero, nun tris de ganar el Goya

A la fin, l'asturianu Jorge Rivero quedó a piques de facese col Goya al meyor curtiu documental na edición 2006 de los Premios de l'Academia de Cine d'España que s'entregaron ayeri pela nueche. El premiu foi pa "En la cuna del aire" del director cántabru Rodolfo Montero de Palacio, y que yera l'otru curtiu col que competía la obra del asturianu xunta la obra del veteranu Antonio - Gimenez Rico, que taba nomináu por "Castilla y León Patrimonio de la Humanidad".

La obra ganadora tien dellos paralelismos cola del autor asturianu, y ello ye que si la cinta de Rivero espeya la decadencia del Mieres industrial, la película de Montero de Palacio fai otru tanto cola desapaición de la vida agrícola y ganadera nel pueblu de San Martín de Elines, au naciere'l director, que ye de familia aldeana, siendo l'enclín autobiográficu otra de les coincidencies que s'atopen en dambes películes. L'estilu y los medios narrativos d'una y d'otra película son, eso si, distintos dafechu.

"Nenyure" de Jorge Rivero ta disponible na programación d'Asturies.com TV.