Jorge Azcón, presidente d'Aragón por un alcuerdu que desanicia la Direición Xeneral de Política Llingüística

El popular introduz a VOX nel Gobiernu.

Les Corz d'Aragón invistieron esta mañana, na primer votación, a Jorge Azcón como presidente del país. El líder del Partido Popular (PP) algamó la mayoría absoluta gracies a los 28 votos del so grupu parllamentariu, los 7 de VOX y el del únicu diputáu del Partido Aragonés (PAR).

Un total de 36 polos 31 del PSOE (23), Chunta Aragonesista (3), Teruel Existe (3), Podemos (1) y IU (1), que se posicionaron en contra. D'esta forma, Azcón sustitúi al socialista Francisco Javier Lambán, al frente del Executivu dende'l 2015.

Anque la so intención yera la de gobernar en solitariu, p'acceder a la Presidencia Azcón apoyóse en VOX, roblando un alcuerdu de gobiernu que da a la formación d'estrema derecha la Vicepresidencia Primera de Desendolcu Territorial, Despoblación y Xusticia y la Conseyería d'Agricultura y Ganadería. Ésti inclúi diez puntos, siendo l'útlimu 'Promover la riqueza y diversidá del nuesu territoriu, defendiendo'l nuesu patrimoniu históricu y cultural', nel que, por contra, deciden la "supresión de la Direición Xeneral de Política Llingüística y treslláu de funciones a la Direición Xeneral de Cultura y Patrimoniu".

Tamién afiten "eliminar les 'ayudes a entidaes ensin ánimu d'arriquecimientu en materia de política llingüística' concedíes pol Gobierno autonómicu saliente y redirixir esi presupuestu a ayudes pa empreses turístiques y culturales que promuevan les fiestes llocales y les feries artesanales". Per último nel terrén llingüísticu, alcuerden la "revisión del testu de la Llei 3/2013 d'Usu, Proteición y Promoción de les Llingües y Modalidaes Llingüístiques propies d'Aragón col oxetivu de prevenir interpretaciones interesaes que perviertan el so verdaderu espíritu de respetu hacia la llibertá de los falantes".