Jony torna a Xixón cedíu hasta final de temporada

|
Jony Rodríguez bienveníu

Montes Torrecilla cubre asina una de les posiciones, l'estremu izquierda, que nun pudo reforciar en branu con un xugador específicu.

Añu y mediu depués de la marcha al Málaga Club de Fútbol tres finar contratu col Sporting, pese al 'interés' del club roxiblancu en renovalu, Jony Rodríguez torna al club que-y permitió enganchase al fútbol profesional. El de Cangas del Narcea va xugar como cedíu en Xixón hasta final de temporada, onde va atopase col so ex compañeru Michael Santos.

El Sporting foi la primer opción pa Jony pa salir de Málaga, con un interés fuerte del Granada pa facese colos sos servicios. Nel so pasu pel club de la Costa del Sol, el cangués nun consiguió afianzase na titularidá, disputando un total de 29 encuentros en Lliga (2 goles) y 4 na Copa, con 1.373 minutos el cursu pasáu y 379 na actual.

Jony, que llegó ayeri a Xixón, foi presentáu esta mañana en Mareo media hora depués d'oficializase la cesión. Na so intervención énte los medios destacó les ganes coles que torna al Sporting y el so bon estáu físicu, col ascensu como oxetivu y ensin descartar continuar nel club roxiblancu la temporada próxima.

Esta tarde, a les 17 hores, va entrenase en Mareo per primer vegada baxo les órdenes de Rubén 'Pipo' Baraja. L'entrenador va dar depués la llista de convocaos pal choque de mañana col Alcorcón (18 hores, El Molinón), na que yá podría entrar el cangués.

Otres llegaes, dependientes del mercáu

Col fichaxe d'un estremu izquierda, el direutor deportivu Miguel Montes Torrecilla consigue reforciar un puestu que'l Sporting tenía coxu tres el final de la cesión de Burgui y que nun pudo completar en branu. El direutor deportivu afirmó que la llegada de más fichaxe va depender de lo qu'ufra'l mercáu.

La posición que centra les atenciones de Montes Torrecilla ye la mediocentru, con la busca d'un perfil creativu inesistente na plantiya a esceición del canteranu Nacho Méndez. Sicasí, la entidá necesita dar salida a dellos xugadores que nun cuenten pal téunicu Baraja, como Quintero o Borja Viguera.

Contador Estadistiques