Jesús Iglesias propón una oficialidá ensin imposición pero con "obligatoriedá pa l’alministración"

El coordinador d'Izquierda Xunida y candidatu a la Presidencia d'Asturies Jesús Iglesias, declaró esti fin de selmana la disposición de la coalición qu'encabeza a aprobar un modelu asturianu d'oficialidá pa la llingua. Nesti modelu, que nun llevaría arreyada imposición nenguna pa los ciudadanos, l'alministración sí tendría la obligación de conocer y utilizar l'asturianu.

Tocante a los mensaxes contrarios a la oficialidá qu'emiten los responsables de la FSA-PSOE, Jesús Iglesias esplicó que nun se facía a la idea de ver "nin a Areces nin a naide na FSA renunciando a la presidencia d'Asturies si pa ello tien qu'aceptar la oficialidá". Pa Iglesias ye evidente que col asturianu "intentóse de too menos da-y la oficialidá" y, con emponderar los esfuerzos de la el Oficina de Política Llingüistica, reconoció que "la nuestra llingua sólo va tener garantizáu el so futuru como instrumentu de comunicación si se reconoz el so calter d'oficial".

Tamién en rellación cola reforma del Estatutu d'Auotnomía, Iglesias centró otres reivindicaciones nel llogru de competencies sobre los ferrocarriles de cercaníes, la meyora de la tresferencia de les competencies hidrográfiques y otres nueves atribuciones sobre política industrial y d'empléu.