Jesús Iglesias píde-y al PP qu’entaine col debate sobre l’Estatutu d’Autonomía

El coordinador xeneral d'Izquierda Xunida d'Asturies, Jesús Iglesias, fizo gúei un llamáu al PP pa que "mire pa contra Asturies" y dexe de trabayar acordies a "conseñes estatales" pidiéndo-y qu'entaine cola reforma del Estatutu d'autonomía d'Asturies y abandone la so postura de nun negociar l'estatutu d'Asturies hasta que nun s'igüen los d'Euskadi y Cataluña.


Pa Iglesias, si'l PP "bloquia cola so actitú irresponsable la posibilidá de que los asturianos tengamos un estatutu nuevu nesta llexislatura, van tener que dar munches esplicaciones". Iglesias ta convencíu de que "nengún asturianu, nin siquiera los votantes del PP puen identificase con esti plantegamientu" y camienta que nun ye normal que'l PP asturianu tranque'l debate de la reforma n'Asturies mientres que sí negocia activamente la de la Comunidá Valenciana. El dirixente d'IX resumió la so petición al PP en qu'Asturies "nun pue quedar nel llimbu de la configuración del Estáu" y en que tampoco "tien que pagar los platos rotos de les engarraes ente PP y PSOE".

Iglesias fizo esti llamáu na presentación de la Xornada sobre Modelu d'Estáu que la so organización política va celebrar esti sábadu en Xixón y que va contar cola presencia de dellos responsables d'IX, ente ellos el coordinador xeneral de la coalición Gaspar Llamazares. El modelu d'España republicana y federal que defende IX va centrar el debate nuna xornada na que van dase a conocer los avances que tan dándose nos procesos de reforma estatutaria d'otres comunidaes autónomes.