Jesús Iglesias diz que “Foro inora tanto la cultura asturiana que nun sabe ónde poner les madreñes”

El coordinador xeneral d’IX, Jesús Iglesias, criticó esti vienres la postura de FAC de “castigar toles iniciatives culturales nes que pueda atopar valores d’izquierda”. Tamién acusó al partíu d’Álvarez Cascos de desconocer la cultura asturiana.

El cabezaleru de la coalición fixo estes declaraciones en referencia a la decisión del equipu de gobiernu municipal de Xixón de cesar a José Luis Cienfuegos al frente del Festival Internacional de Cine de Xixón (FICXixón). Iglesias valoró’l so llabor a lo llargo de 16 años, xestionando un "certame esitosu" nel que "el cine asturianu yá tenía presencia". Poro, añadió que "ye falso que se cambie la xestión pa dar participación" a les producciones del país, como s’anunció a la hora de facer públicu’l nomamientu de Nacho Carballo al frente del festival. Na so opinión, la decisión de FAC respuende más a la so actitú de "castigar toles iniciatives culturales nes que puea atopar valores propios de la izquierda".

En referencia a l'apuesta pol cine asturianu anuncia, Iglesias apuntó que "préstenme muncho les madreñes, pero'l problema ye poneles mal. Nos pies son d'una utilidá terrible, pero cuando les lleves na cabeza les tos idees nun cuerren. Foro inora tanto la cultura asturiana que nun sabe ónde poner les madreñes y ponles na cabeza", llogrando un "resultáu catastróficu".