Javier Fernández echa pola oficialidá nel día de la manifestación

El secretariu xeneral de la FSA-PSOE Javier Fernández volvió a dexar clara la posición del so partíu sobre la oficialidá del asturianu nel mesmu día en que miles de persones la pidíen peles cais de la capital asturiana. Nel congresu de les xuventúes socialistes asturianes, Fernández aseguraba que "Preservar la llingua asturiana ta bien, pero glorificala non, porque'l raigón de la intolerancia finca na sobrevaloración de lo propio".

El líder socialista remachaba la so tésis, ya espresada n'otres ocasiones de que tres del movimientu de defensa del asturianu hai un proyectu nacionalista. Nes sos propies palabres "los defensores de la oficialidá piensen menos na llingua como instrumentu de comunicación que como instrumentu ideolóxicu". Yendo más allá del planteamientu inicial d'esta tesis, Fernández rellacionó oficialidá con imposición y nacionalismu, ideoloxía política de la qu'aseguró que "nun ye que pretendan mandar en casa, ye que pretende qu'ellí sólo vivan los d'ellos".