Javier Fernández confirma en Madrid que’l candidatu de la FSA ha de reconocer la oficialidá

El tema de la oficialidá colóse nel turnu d’entrugues de periodistes qu’acudieron a la Tribuna del Fórum Europa qu’entama Nueva Economía Fórum nel madrilanu Hotel Ritz y na que Javier Fernández foi’l convidáu. El presidente confirmó que’l futuru candidatu de la FSA a la Xunta Xeneral ha de reconocela.

“El Partido Socialista incorporólo nel Congresu y, polo tanto, va llevalo nel programa. Yo nun voi ser candidatu, y el candidatu va tener qu’asumilo y supongo que tará d’alcuerdo”, aseguró Fernández. Foi na respuesta a dos entrugues, sobre la demanda social “para caminar hacia la cooficialidad del bable” –que nun llegó a tratar na so intervención– y a esta cuestión concreta “introduciendo de forma irresponsable un debate identitario que ahora no conviene a España”.

El presidente del país, al igual que fixo na Xunta Xeneral y n’otres declaraciones al respeuto, dexó nidia la so postura contraria a la oficialidá énte los políticos y periodistes madrilanos presentes y definió la cooficialidá como una figura pola que “los poderes públicos tán obligaos a da-y la mesma proteición llegal qu’al castellanu y eso pue entendese que dea llugar a imposiciones. Lo que sí ye evidente ye que xenera obligaciones pa determinaos axentes y lo que quiero pensar ye que’l plantegamientu ye fundamentalmente por caltener la llingua, que ye un instrumentu de comunicación, y potenciala”.

Al respeuto, y entrando nel conteníu de la segunda entruga, señaló darréu que “nun podemos evitar la esistencia de grupos que van pensar na llingua asturiana menos como un elementu de comunicación que nun factor d’identidá, y esto ye evidente que conlleva riesgos”.

Financiación autonómica

Fernández acudió a Madrid convidáu por Nueva Economía Fórum pa poner la conferencia ‘La dimensión constitucional de la financiación autonómica’, na que se declaró “partidariu decidíu de la reforma constitucional”, non como un “premiu de consolación al secesionismu", sinón “como una esixencia p’ameyorar el funcionamientu del Estáu autonómicu”, dalgo que ve difícil pola falta de consensu. Sobre la reforma de la financiación autonómica, refugó que cualquier movimientu que se faiga provoque privilexos d’unes comunidaes sobre otres, asina como que se toquen “aspeutos nucleares” del sistema enantes d’una futura reforma constitucional “pa non condicionala”.

“Pienso n’Asturies, la comunidá que gobiernu, y nun quiero que’l porvenir de la mio tierra se condicione por alliances coyunturales, por ambiciones a plazu curtiu, por urxencies financieres d’unos o d’otros, o por compensaciones económiques p’apanguar la tendencia independentista”, apuntó’l socialista. Mentes, sobre la postura de negociación de Pedro Sánchez con Mariano Rajoy, nun ocultó la so sorpresa pol xiru del secretariu xeneral del PSOE, al tiempu que lu celebró.

Semeya obra d'Armando Álvarez.