El candidatu del PSOE, Javier Fernández, mostró la so satisfaición tres conocer los resultaos del votu emigrante. El ganador de les eleiciones reafirmó’l so “compromisu” de liderar un gobiernu estable.
 
En rueda de prensa na sede socialista d’Uviéu, Fernández quixo tresmitir l’agradecimientu a los eleutores y insistió en que mantién la so intención de dialogar con toles fuercies. "Siguimos esactamente cola mesma idea que teníamos al entamu, y qu’espresé la nueche eleutoral, de buscar la gobernabilidá d’Asturies y la estabilidá institucional", aseveró tres conocese de forma oficial que los socialistes alcancen los 17 diputaos tres quita-y un escañu a Foro de Ciudadanos na circunscripción occidental. Tamién remarcó que’l so partíu gana en les trés circunscripciones mentes que la segunda fuercia política con más representación parllamentaria, el partíu de Francisco Álvarez-Cascos ta a una distancia "sensible" de cinco diputaos al situase con 12, siguíu por PP con 10, IX con 5 y UPyD, con 1.
 
Respeuto a la relevancia qu’alcanza’l diputáu d’UPyD, Ignacio Prendes, al tener PSOE (17) e IX (5) los mesmos escaños que la suma de Foro (12) y PP (10), Fernández reconoció que nun analizó si’l programa de la formación lliderada por Rosa Díez tien puntos insalvables pa una negociación posible. "La verdá ye que non. La verdá ye que pa lo que tuvi tiempu foi pa concertar con UPyD, y col restu de fuercies polítiques, una reunión", dixo en respuesta a los periodistes resaltando que se trata d’un "primer contautu" dientro del diálogu qu’ha de tener con tolos partíos con representación na Xunta Xeneral. L’aconceyamientu con Prendes ta previstu pal vienres a les 10 hores.