Javier Fernández acusa a les propuestes nacionalistes de facer “bonos y malos asturianos”

El secretariu xeneral de los socialistes asturianos, Javier Fernández, fizo esti fin de selmana delles valoraciones tocantes al panorama políticu d'Asturies y les perspectives de la reforma estatutaria, too ello a la lluz de los últimos datos sociolóxicos asoleyaos pol CIS sobre Asturies.

El tratamientu que vaya tener la llingua asturiana na reforma estatutaria foi ún de los temes de los que faló Fernández, quien declaró que la FSA ta esperando a ver la primer propuesta concreta que se-y faiga nesti sentíu pa pronunciase al favor o en contra de la mesma, ello dempués del ofrecimientu del secretariu d'IX Jesús Iglesias pa una "cooficialidá ensin obligatoriedá". Anque alvirtió que los socialistes nun diben permitir que se-yos presentare como "enemigos del asturianu" Fernández afitóse na idea de vieyo de la FSA d'una política de promoción del asturianu ensin reconocimientu de la oficialidá.

El presidente de los socialistes asturianos meció oficialidá con nacionalismu y calificó de "ensoñación nacionalista" los plantegamientos que falen de "facer país" en clara referencia al lema d'Izquierda Xunida, atechándose nos datos de la encuesta del CIS que falen de la percepción mayoritaria d'Asturies como una rexón por parte de los asturianos pa facer de menos estes propuestes, afirmando que "equí hebo a lo llargo de 40 años bonos y malos españoles, namás faltaba qu'agora hubiere bonos y malos asturianos".