Jason Ringenberg abre la riestra de conciertos del fin de selmana

Les lletres crítiques col gobiernu Bush del músicu americanu van sentise esta nueche nel Álbeniz de Xixón abriendo una ufierta pal fin de selmana qu'incluye dende "Loquillo y trogloditas" al post-punk de "The Movies"

Creador d'un camín nuevu pal country, l'estadounidense Jason Ringenberg remocicó'l xéneru va 20 años, amestando la tradición musical americana coles tendencies d'aquel tiempu. Asina nació'l "cow punk", que lu convertió nun artista de sonadía nos Estaos Uníos con xires d'añu y mediu con más de 300 actuaciones acompañáu pol grupu "scorchers". Güei, Ringenberg da una vuelta más al fusu de la so música con "Empire Builders" un discu con lletres de denuncia contra la política conservadora de los EEUU. El músicu americanu entama esta nueche en Xixón (Sala Albéniz 22:30h) la so xira europea que lu va llevar hasta setiembre per cuatro países d'Europa y pel Canadá.

D'otra manera, el fin de selmana va ufiertar tamién música de tolos palos. El rock sinfónicu de "Medina Azahara" va sonar el sábadu na discoteca "El Jardín" de Xixón, mientres que Loquillo y Trogloditas, cola presencia del asturianu Igor Pascual van tocar el vienres na Sala Quattro d'Avilés. Cambiando d'estilu dafechu, el sábadu hai música americano col grupu de post-punk "The Movies" presentando'l so discu "American Oil" na sala "Parque del Piles" de Xixón.