Jacky Trap confirma'l so ésitu

La banda avilesina "Jacky Trap" presentó esta
selmana una reedición del so primer discu qu'incluye un Dvd.



"Jacky Trap" con solo un discu nel mercáu yá son
reconocíos nos circuitos musicales estatales como una promesa y un
presente del Metal. La bona acoyida que tuvo esti primer discu, que s'edito
l'añu pasáu, llevó al grupu a conciertos per tol
Estáu español y apaiciones en medios de comunicación. Esti
ésitu quier reforzáse agora cola reedición del primer y
únicu discu de la banda que lleva'l nome de la banda,
"Jacky Trap". Pero esta
reedición lleva'l regalu d'un Dvd, nel que vamos poder ver los cuatro
videos musicales del grupu, un reportaxe sobre la xira del grupu, una
galería de semeyes, un conciertu nel Derrame Rock y una entrevista cola
banda.



El grupu, qu'agora mesmo trabaya cola discográfica
Santo Grial, yá ta
preparando un nuevu discu pal añu qu'entra. A primeros de 2004 la banda
avilesina tien delantre un gran retu, confirmar col so segundu discu que nun
son una casualidá, y que van siguir dando muncho que falar. Pa ello
cuenten col apoyu de la discográfica, un públicu que yá ye
fiel siguidor de la banda y sobre too cuenten con una banda solida encabezada
pola cantante Karmen.