Izquierda Xunida refuga’l decretu del Estáu sobre Tresxénicos

El diputáu d'IX-BA, Aurelio Martín, dio ayeri una rueda de prensa na qu'espresó la refuga de la coalición al proyectu de Decretu del Gobiernu central pa regular los cultivos tresxénicos. Pal responsable d'IX-BA el documentu que se propón dende Madrid ye'l más permisivu de tola Unión Europea y, pal casu concretu d'Asturies podría traer consecuencies bien gafes pa los agricultores y consumidores, neto que pa la imaxe d'asturies, pa la que pidió la declaración de "rexón llibre de tresxénicos"

Aurelio Martín remembró que'l consumu de productos alteriaos xenéticamente ye dañible pa la salú y que les encuestes espeye que'l setenta y ún por cientu de los europeos refuguen estos cultivos, datos colos que-y abulta "decepcionante" que'l gobiernu de Zapatero faiga un apueste por consentir con ellos, escaeciendo'l criteriu d'organizaciones agraries y ecoloxistes y faciendo por reforzar el dominiu d les poques multinacionales que remanen el mercáu de patentes sobre estos cultivos.

El debate sobre los tresxénicos llegó a Asturies a últimos del 2003 cuando se conoció que nel país se punxeren les primeres seyes hectárees de maíz tresxénico. El sindicatu agrícola COAG-Asturies, foi'l primeru en marcase, y dafechu en contra, énte la llegada del maíz alterao. Pa COAG, la convivencia ente variedaes tresxéniques y normales ye imposible, y entiende que ta xenerándose un marcu llegal, a nivel européu y estatal, que prepara l'espardimientu de tresxénicos a gran escala. Esti marcu llegal ígüenlu'l proyectu de recomendaciones sobre'l tema de la UE y un borrador estatal d'Orde sobre normes de coesistencia de los cultivos modificaos, convencionales y ecolóxicos qu'agora ta pa convertise nel decretu oficial contra'l que protesta IX-BA.

El pasáu mes d'abril, el Gobiernu asturianu firmare en Florencia'l so compromisu cola asociación de rexones de la UE que quieren sacar alantre la so agricultura ensin el concursu nella de los Organismos Modificaos Xenéticamente. La conseyera asturiana de Mediu Rural y Pesca, Servanda García Fernández, firmó la entrada formal d'Asturies a esta rede na que tans 27 rexones comunitaries, ente elles Asturies y Euskadi, úniques del Estáu Español na rede. De cualquier manera, la declaración de Florencia nun pue ser más qu'una declaración d'intenciones y configuradora d'un grupu de presión, y la mesma comisaria europea d'Agricultura, Mariann Fischer Boel, recordó que ye imposible que les rexones prohiban pola so cuenta los tresxénicos, en cuantes que la llexislación europea nun-yos da a les rexones autonomía pa decidir sobre esi estremu.