Izquierda Xunida critica que se convierta'l Plenu “nun monográficu sobre la oficialidá”

|
Ángela Vallina depués de Xunta de Voceros recortada y reducida

"Yera un tema que dicíen que nun yera importante pa la sociedá y agora paez que se convirtió nel más importante pa l'axenda de la derecha", apunta Ángela Vallina.

La vocera d'Izquierda Xunida (IX) critica que PP y VOX, que van convertir "nun monográficu sobre la oficialidá" el Plenu próximu, "lo único que busquen ye facer del asturianu una división y un problema falsu, que nun esiste na sociedá; un motivu d'enfrentamientu". "Val-yos cualquier cosa pa criticar la oficialidá", siguió la castrillonense, qu'aseguró que'l so partíu nun va entrar "en debates falsos que namái busquen la crispación".

"Esto ye un monográficu que va llevar al enfrentamientu", insistió sobre'l Plenu del martes y miércoles. "Meyor respetaben los derechos de los asturianos y les asturianes como faen en Galicia y n'otres comunidaes onde gobiernen", sentenció Vallina depués de la Xunta de Voceros.

Sobre l'informe que provocó tou esti movimientu últimu de la derecha, quitó-y importancia. "¿Sí a la oficialidá 27? Bien, a partir d'ehí veríamos el modelu y correspondería poner l'estudiu enriba la mesa para ver por qué opción, los 27 qu'apoyábamos la oficialidá, se decidía optar. Sería lo lóxico, non entamar la casa pel teyáu porque, si nun hai 27 y nun hai alcuerdu, como si tenemos 400 informes; da igual, nun va haber oficialidá si nun hai 27", reflexonó.

Otra manera, nuna entruga sobre la reclamación de Podemos pa que'l Gobiernu presente un proyeutu de reforma del Estatutu a la Xunta Xeneral p'abrir un alderique que fine cola aprobación de la modificación de la norma, Vallina respondió qu'ensin contar colos 27 diputaos necesarios sería llevar al Parllamentu "una engarradiella pa beneficiu de la derecha y la derecha estrema".

Na semeya, Vallina esta mañana.

Contador Estadistiques