Izquierda Xunida afirma que ta “indignada” poles decisiones de Fomentu pa cola Variante de Payares

Jesús Iglesias, coordinador d’Izquierda Xunida (IX), afirmó que la so formación ta “indignada” poles decisiones de Fomentu pa cola Variante de Payares. Considera “una estafa” la instalación del anchu convencional y nun cree que tea abierta pal 2012.
 
Según aseguró Iglesias nuna rueda de prensa n’Uviéu, la instalación d’esti anchu convencional supón la non llegada de l’alta velocidá a Asturies, yá que la vía del anchu AVE terminaría en La Robla. D’igual forma apunta que ye “imposible” que la Variante de Payares entre en funcionamientu nel 2012 como aseguraron ayeri dende Fomentu. “Nun va tar llista hasta’l 2014 o’l 2015”, señaló, pa depués añadir que lo que l’Alministrador d’Infraestructures Ferroviaries (Adif), dependiente de Fomentu, pretende colos sos incumplimientos ye una “mengua” de les inversiones n’Asturies.
 
Por esti motivu, el coordinador d’IX fai un llamamientu a la sociedá asturiana pa que proteste polos incumplimientos y dixo que la so formación ta dispuesta a encabezar esa rebelión. Asina, anunció que va promover reuniones nel mes de setiembre. Na opinión d’Iglesias, estes decisiones del ministru de Fomentu, José Blanco, nun van pasar desapercibíes pa los asturianos nes xenerales del 20 de payares.
 
Iglesias, pa terminar, destacó la importancia de qu’Asturies tenga representación nel Congresu los Diputaos como “resistencia” pa defender l’estáu del bienestar ante una victoria previsible del Partido Popular y les midíes “antisociales” que yá fixo’l presidente estatal José Luis Rodríguez Zapatero. “IX tien pedigrí pa defender en Madrid esti país que se llama Asturies”, aseguró.