Izquierda Asturiana y PSOE lleguen a un pautu pa gobernar Piloña

El PSOE y Izquierda Asturiana tan acabante d'anunciar el pautu de gobiernu que
va permitir a los socialistes algamar l'alcaldía piloñesa tres
ocho años de mayoría absoluta del PP. D'esti mou'l candidatu
socialista, Camilo Montes, va convertise n'alcalde de Piloña mientres
que'l conceyal d'Izquierda Asturiana, Jose Ángel García
"Allende", asumirá la tenencia d'alcaldía y les
conceyalíes de Mocedá, Obres y Participación Ciudadana.
Nes elecciones del pasaú 27 de mayu'l PP y el PSOE empataron nel
númberu de conceyales, al obtener seis, siendo decisivu l'únicu
representante d'IAS.


Entrambes dos fuercies anunciaren les llinies maestres peles que se va guiar el
gobiernu municipal. Estes llinies van desenvolvese al traviés de
midíes concretes que se van dar a conocer nes selmanes venideres.
L’acuerdu resulta satisfactoriu pa IAS porque "asume na so
totalidá el nuestru programa electoral", según
indicó’l conceyal d’Izquierda Asturiana (IAS) José
Angel García "Allende". Pal conceyal d’IAS "la
concreción del acuerdu tien d’asegurar la tresparencia y
austeridá na xestión, los criterios ecolóxicos na
política municipal y un impulsu y normalización ensin precedentes
nel campu municipal de la cultura y la llingua asturianes, per aciu d’un
plan nel que yá tamos trabayando".

Allende congratulóse de
"esti cambéu de gobiernu que tien que traer un cambéu a
Piloña que noten los vecinos cuanto primero" nesi sen
aseguró que la llave d’IAS tien que s’usar pa "facer
polítiques allongaes de los mayos de les mayoríes absolutes y les
caces de bruxes y con una sensibilidá distinta". Per otru llau el
conceyal d’Izquierda Asturiana (IAS) destacó que dende la
conceyalía de Participación Ciudadana, que ye de nueva
criación a propuesta d’IAS, "va dase la voz a la xente y tien
que valir pa desenvolver la democracia participativa" mentres que dende la
conceyalía de Mocedá "vamos trabayar pa que lo más
mozo tenga alternatives en Piloña". Finalmente Allende
destacó que "na política local ye más fácil
llegar a acuerdos ente fuercies que n’otros ámbitos puen tener
diferencies importantes" y aseguró que "l’acuerdu foi
rápidu ente otres coses pola sensibilidá asturianista y
d’esquierdes del candidatu del PSOE en Piloña". Dende
Izquierda Asturiana (IAS) van dir dándose a conocer próximamente
les midíes que se van tomar dende les sos conceyalíes y los
planes concretos que s’apautaren col PSOE piloñés.