IX y PSOE, enfrentaos pol procedimientu pa escoyer la dirección de la RTPA

El diputáu autonómicu del PSOE, Fernando Lastra, afirmó ayeri que'l grupu parlamentariu socialista va presentar una proposición de Llei pa que la elección de la reforma de la Televisión del Principáu d'Asturies s'apruebe por mayoría cualificada y "non por mayoría absoluta como pretende Izquierda Xunida n'otra proposición de Llei". Lastra realizó estes declaraciones a los periodistes na Xunta Xeneral del Principáu al conocer la propuesta d'IX que pretende que seya la Cámara parlamentaria la qu'apruebe la reforma del ente públicu y non el Gobiernu del Principáu.

El diputáu socialista dixo, nesti sentíu, qu'IX pretende que seya'l Parlamentu'l que gobierne y de momentu, aseguró, el Gobiernu ye'l que gobierna y el parlamentu llexisla. El responsable de la FSA calificó amás, la proposición de llei d'IX de "inxenua y precipitada".

"IX pretende que la elección del Director Xeneral del Ente Públicu la refuercie una mayoría absoluta cola pretensión de que tolos partíos tengan que negociar cola formación d'izquierda", apuntó Lastra. Por ello, el diputáu socialista punxo d'exemplu la reforma de la Llei de Televisión Española (TVE) na qu'IX a nivel nacional aceptó que fuera'l Gobiernu de la nación el que plantegara la proposición de Llei, polo que "n'Asturies habría de siguise'l mesmu exemplu".