IX y Bloque emponderen el llau social de los presupuestos

El proyectu de presupuestos Xenerales p'Asturies nel 2005 dexa contentos a los socios minoritarios del gobiernu, anque tampoco-yos abulta'l meyor presupuestu de los posibles. Guillermo Ballina, de la Comisión Permanente d'Izquierda Xunida, valoró p'Asturies.com los presupuestos 2005 como unos presupuestos que van valir pa desarrollar los puntos del alcuerdu de gobiernu y qu'enxerten "aportaciones interesantes pa facer d'ellos unos presupuestos d'izquierda". En cuantes a lo que se consiguió na negociación, Ballina esplicó que les mayores novedaes sobre'l proyectu base que se consiguieron na negociación vinieron nes arees de vivienda, sanidá, polítiques sociales, tresferencies a los conceyos, seguridá llaboral y en materia cultural.

No tocante a la tensión que se vivió enantes de roblar el presupuestu, coles declaraciones que fixere'l conseyeru Rabanal dando anuncia, ensin qu'IX tuviere conocimientu d'ello de que'l presupuestu taba fechu y les del Presidente Areces nes que dixo que'l presupuestu negociábase ente conseyeríes y non ente partíos, Ballina nun quixo cargar contra los sos socios mayoritarios de gobiernu, xustificando'l so comportamientu pola "falta d'esperiencia" que tien el PSOE en gobernar en coalición.

El dirixente d'IX aclarió que, anque "nun discutimos el modelu del PSOE a la hora de rellacionase col so propiu gobiernu", IX tien un derechu evidente a negociar los presupuestos en cuantes que "el pautu de gobiernu ye ente partíos, non con dos conseyeríes", y sorrayó esi derechu cola participación efectiva que tien IX n'asuntos que trescienden les fronteres d'Asturies, casu de la Variante de Payares, el tramu Unquera-Llanes o l'Hospital nuevu.

Pela parte del Bloque por Asturies, Rafael Palacios pronuncióse en términos asemeyaos a los de Ballina a la hora d'interpretar l'actitú del PSOE nes selmanes previes a la negociación. Palacios criticó la "falta de vezu a gobernar en coalición del PSOE" y calificó l'actuación de Rabanal de "error". En cuantes a los presupuestos finales, que lleguen pa Palacios nun momentu "mui importante" pa garantizar la continuidá del alcuerdu de gobiernu, el dirixente del Bloque congracióse de que los presupuestos del 2005 van aumentar les partíes que se dediquen a la inversión social y van permitir echar a andar la Llei del Salariu Social, ún de los oxetivos principales del Bloque y que llevaba yá un retrasu grande.