IX reconoz que nun va haber reforma del estatutu nesta llexislatura

El Coordinador Xeneral d'Izquierda Xunida d'Asturies Jesús Iglesias da por fecho que nun va reformase l'Estatutu d'Autonomía d'Asturies na llexislatura presente, y échá-y la culpa d'ello al PP, que se niega a entamar el procesu. Pa iguar na midida de lo posible la falta d'un estatutu nuevu, el dirixente d'IX pidió que s'entame a negociar un modelu nuevu de financiación pa la comunidá autónoma que podría pesllase pal mes d'ochobre.

El dirixente d'IX camienta que'l Conseyu de Política Fiscal y Financiera d'Asturies tendría d'entamar col llabor paesti modelu nuevu de financiación en setiembre y rematalu a mediaos d'ochobre pa poder inxertalu na redacción de los Presupuestos Xenerales del añu qu'entra. Jesús Iglesias apurre como claves pa definir esti modelu de finaciamientu l'atender a les necesidaes de la población acordies col so grau d'avieyamientu y d'espardimientu territorial y pide que, en nengún casu, se faiga la reforma acordies a criterios de númberu d'habitantes ensin tener en cuenta estos factores.

En cuantes a la imposibilidá de llevar alantre la reforma estatutaria n'actual llexislatura, Iglesias afirmó que'l bloquéu del PP pa la reforma dexa a Asturies "nuna situación mala" y "al marxe del procesu de revisión del modelu d'estáu", polo qu'Asturies al final de tol procesu namás va sacar en claro qu'una "fotocopia de recortes d'estatutos d'otres comunidaes autónomes" pa facer el so estatutu nuevu. Además, indica, el PP está impidiendo un debate multilateral en materia de financiación .