IX plantega reactivar la reforma introduciendo como otru elementu central la cohesión territorial

|
Ángela Vallina

“Incorporemos tamién el retu d’Asturies vaciada nuna futura reforma del Estatutu d’Autonomía”, propunxo Ángela Vallina a Adrián Barbón esti miércoles nel Plenu de la Xunta Xeneral. La diputada d’Izquierda Xunida (IX) refugó dala “por aplazada y munchos menos por fallida” y plantegó asitiar la cohesión territorial como elementu central xunto cola oficialidá pa reactivala.

Vallina fixo esta proposición nel so segundu turnu llueu de la entruga al presidente “¿Qué estratexa tien prevista’l so Gobiernu pa l’Asturies vaciada?”, pero na réplica’l socialista nun entró a valorar la reactivación d’una mesa de negociación que, como confirmó depués llueu d’otra pregunta por parte de VOX, da yá por finada énte la falta d’alcuerdu, poniendo l’horizonte de la mesma yá nel 2023, na llexislatura próxima. “El mio plantegamientu ye que constitucionalicemos el problema y los elementos esenciales p’abordalu. Asturies lideraría una respuesta d’esta naturaleza a un retu que ye xeneral en tol Estáu”, apuntara la castrillonense sobre’l retu demográficu.

Frente a los discursos antipolíticos, demagóxicos y antidemocráticos, “les fuercies polítiques democrátiques hemos reaicionar abordando la cuestión pa resolvela”, siguió la diputada, que reclama “un gran alcuerdu” que permita convertir “el problema del vaciamientu d’Asturies, sobre manera nel oriente y nel occidente, nun problema de país, un problema de comunidá”. “Debería convocase un pautu pola Asturies vaciada nesta primavera próxima”, solicitó a Barbón.

Pa finar, apuntó que “hai que reforciar la dimensión material d’esi proyeutu estatutariu, porque seguramente asina-y daremos mayor utilidá y viabilidá a la nuesa norma fundamental”. "Recoyendo la propuesta que vusté fai y, puesto qu'hai unes conclusiones de la Comisión del Retu Demográficu, quiciabes el camín a siguir sería un debate llexislativu al rodiu d'una Llei de Retu Demográficu", respondió Barbón, "que llueu tuviera reflexu presupuestariu".

Contador Estadistiques