Día del Llibru Asturianu

IX entruga a Educación pol criteriu organizativu pa xuntar a los escolinos de Llingua colos de Cultura Asturiana

|
Ángela Vallina y Víctor Suárez frontal alcuentru telemáticu IX-Iniciativa pol Asturianu

L’entamu del cursu 2020-2021 avérase y Izquierda Xunida (IX) presentó a la Conseyería d’Educación delles duldes sobre la materia d’asturianu. Ente elles ta’l criteriu organizativu que va siguir pa xuntar a los escolinos de Llingua Asturiana y Lliteratura colos qu’escueyen la de Cultura Asturiana nel escenariu actual.

Ángela Vallina, vocera d’Asturies pela Izquierda (IX-IAS) na Xunta Xeneral, tamién tresllada al Gobiernu cómo pretende garantizar el derechu de los estudiantes que quieren deprender n’asturianu y del profesoráu especialista nestes circunstancies marcaes pola crisis sanitaria pola COVID-19. "Nun tenemos tovía claro cómo se va xestionar organizativamente la docencia nel área de Llingua Asturiana y Lliteratura, qué garantíes tien el profesoráu especialista y cómo se va garantizar el derechu del alumnáu a cursar l'asignatura”, esplica Víctor Suárez, responsable de Política Llingüística d’IX.

La organización manifiesta tamién el so malestar cola campaña de matriculación na materia, abierta anguaño anque adelantada a xunu en dalgunos centros, y insta a la conseyera Carmen Suárez Suárez a indicar qué incidencia tuvo la mesma nes inscripciones nueves. "Esperábemos un cambiu sustancial pa esti cursu, yá que la promoción de l'asignatura ye un mandáu de la Llei d'Usu que se tendría que tar cumpliendo. La campaña llegó a munchos centros l'últimu día de xunu cuando yá nun había alumnáu y cola prematrícula fecha nos más de los casos. Ye difícil que, d'esta manera, xuba de manera significativa'l númberu d'escolinos y escolines que cursen l'asignatura”, critica Suárez.

Contador Estadistiques