IX en Mieres denuncia acciones de la FSA contra'l pactu de gobiernu y la posible candidatura d'Areces

L'agrupación mierense d'Izquierda Xunida denuncia que sectores
de la FSA forzaron la salida d'IX del gobiernu de Mieres col únicu
oxetivu desestabilizar l'acuerdu de gobiernu pa debilitar a Vicente
Álvarez Areces como próximu candidatu.



Izquierda Xunida de Mieres ta acabante de reaccionar énte les
declaraciones que se facíen dende la FSA, onde afirmaben que
"volaríen pelos aires" el pactu de gobiernu d'Asturies si IX
de Mieres propón un candidatu a l'Alcaldía alternativu a Luis
María García (PSOE), en casu de prosperar la moción de
confianza nel Conceyu de Mieres. Pa Izquierda Xunida queda claro, depués
d'estes afirmaciones, que "la espulsión d'IX del gobiernu de Mieres
nun tuvo nada que ver col municipiu y que sólo tuvo como oxetivu xenerar
problemes graves al primer gobiernu de la izquierda plural n'Asturies pa
evitar, dende'l sector más duru de la FSA, que l'agora Presidente del
gobiernu tenga opciones de repetir como candidatu nes próximes
elecciones del 2007". Amás dende la coalición tamién
apuntaron a los culpables personificándolos en Jesús Gutierrez
secretariu d'organización y Balbino Dosantos secretariu xenral de los
socialistes en Mieres.



Dende IX consideren impresentable que se xuegue asina cola
estabilidá política y presupuestaria d'un municipiu nuna
situación tan delicada como la de Mieres. Asina consideren que "nun
se puede espulsar a una fuerza política del gobiernu, refugar la
posibilidá d'alcordar un presupuestu d'izquierdes, nun facer por llegar
a un entendimientu políticu, fundir al municipiu na mayor crisis
institucional del periodu democráticu y amenazar agora con romper el
pactu autonómicu". Pa Izquierda Xunida estes actitúes
namás que s'entienden poles disputes de les diferentes families
socialistes de cara a les próximes elecciones de 2007. Ye dicir, IX cree
que cada vez ye más claro que dientro de determinaos sectores de la FSA
hai una estratexa pa torgar la posibilidá de qu'Areces seya candidatu
nes próximes elecciones.



Con too y con ello, Izquierda Xunida pide la intervención
inmediata del alcalde socialista de Mieres, Luís María
García, p'acabar con esti "espectáculu que puede mancar la
estabilidá y la imaxe del gobiernu d'izquierdes d'Asturies, y dexar al
gobiernu de Mieres nuna situación percomplicada".