IX d'Asturies reclama a la direición federal una renegociación con Podemos de les llistes

|

La coalición llevaría'l númberu 3 al Congresu y el primer suplente al Senáu. EQUO súmase al pautu ente les dos formaciones.

"L'alcuerdu actual nun obedez a la fuercia real d'IX, al apoyu que tenemos, a lo que representamos nesta comunidá y a la capacidá que tenemos de sacar un diputáu por nós mesmos", afirmó Alejandro Suárez, coordinador llocal d'IX Uviéu y covoceru de la comisión nomada pola presidencia colexada d'IX pa treslladar a la direición federal los pidimientos d'Asturies. Dicha comisión va caltener mañana al meudía una reunión en Madrid col secretariu d'organización federal, Adolfo Barrena.

"Naide entendería qu'entremos nuna negociación con un diputáu y salgamos ensin él. Ye mui importante pa nós", apuntó Suárez, qu'amosó la so confianza en llegar a un compromisu afayadizu pa la organización asturiana.

EQUO tamién robla l'alcuerdu

Tres los alderiques que caltuvieron los representantes d'EQUO nos díes últimos con Podemos, la organización ecoloxista algamó un alcuerdu pa formar d'una coalición d'ámbitu estatal ente Podemos, IX y EQUO "y otres fuercies del cambiu pa les eleiciones del 26-X". EQUO yá participó nes candidaturas de Podemos el 20-A, contribuyendo de manera significativa nos resultaos n'Euskadi, onde los sos covoceros estatales Juantxo López de Uralde (númberu 1 n'Araba) y Rosa Martínez (númberu 2 en Bizkaia) algamaron escañu, amás de Jorge Luis Bail, por Uesca en representación del espaciu de confluencia Alto Aragón en Común.

El pautu caltién los puestos al Congresu n'Araba y Bizkaia, y inclúi mayor presencia de EQUO nes llistes de tol Estado, según informó esta formación.

 

 

Contador Estadistiques