IX-BA-Verdes proponen la creación d'una fiscalidá nueva nel so programa electoral

La coalición electoral que faen Izquierda Xunida d'Asturies, Loa Verdes y Bloque por Asturies presentó esti fin de selmana les llinies maestres del so programa electoral pa les autonómiques del próximu mes de mayu. Lacreación d'impuestos nuevos sobre la vivienda desocupao, los solares ensin edificar y los depósitos bancarios formen parte d'un estoyu de midíes fiscales que centraron la presentación y nel que s'amiesta una xuba de la tasa a les grandes superficies comerciales y l'inxerimientu duna mayor progresividá nel tramu autonómicu del IRPF. L'oxetivu final de toes estes midíes ye'l de llograr que "paguen más los que más tienen".

L'asturianismu, lo verde y lo encarnao, entendío como un "proyectu socialista de tresformación social" son los trés exes del programa d'IX-BA-Verdes que presentó'l candidatu a la presidencia Jesús Iglesias. Dientro d'esti proyectu les estrelles sedríen los servicios públicos de calidá "pagaos polos que más tienen" la escuela "pública y laica" y la integración de los hospitales de Les Arriondes y Xove nel Serviciu de Salú Pública. IX-BA-Verdes pide que se dble'l volume de recursos de los que s'acutaron na llexislatura que termina pa polítiques sociales. La xuba de la retribución del salariu social y la creación d'un plan d'integración de los inmigrantes son parte d'un programa que tien na vivienda otru de los sos pegoyos. El reconocimientu del derechu suxetivu a la vivienda, ayudes pa facer frente a la xuba de les hipoteques y la promoción de 16.000 viviendes nueves con daqué tipu de protección son parte del programa electoral.

El representante del Bloque por Asturies, Rafael Palacios esplicó que la coalición va lluchar por un Estatutu d'Autonomía qu'inxerte "como mínimos" la oficialidá del asturianu, el reconocimiento de los derechos a la salú y la educación, y el máximu nivel competencial" ello xunto cola creación de la circunscripción electoral única pa toa Asturies.

Na política cultural y de comunicación, delles de les midíes del programa van ser la redacción d'un nuevu plan de normalización llingüística o la elección pola Xunta Xeneral del director de la RTPA, que vería llendaos los sos gastos al 0,5 % del presupuestu autonómicu, ello xunto cola concesión de nueves llicencies de TDT.

Pela so parte, el representante de Los Verdes, Enrique Fernández, esplicó que'l programa electoral va incluyir tamién la creación d'una Conseyería esclusiva de Mediu Ambiente, la refuga al embalse de Caliao y la incineración de residuos o la creación d'un institutu pal desarrollu urbanísticu sostenible que sustituya a l'actual CUOTA.