IX-BA demanden la oficialidá y el reconocimientu d’Asturies como “nacionalidá”

Izquierda Xunida - Bloque por Asturies (IX-BA) presentaron ayeri los puntos fuertes de la so propuesta de reforma estatutaria p'Asturies. Roberto Colunga pol Bloque por Asturies y Jesús Iglesias por IX adelantaron en rueda de prensa que la coalición va incluyir qu'Asturies se defina como "nacionalidá" y que se declare la cooficialidá del asturianu. IX-Ba tamién quier que s'acelere'l procesu de reforma pa poder pesllalu na llexislatura actual y que nun se retrase pa dempués de les elecciones del 2007.

Iglesias alvirtió que la oficialidá del asturianu "forma parte de la identidá d'IX-BA", pero reconoció que tan dimpuestos negociar los mecanismos o los plazos pa poder facela efectiva. IX-BA sorrayaron el so apueste por un estáu "republicanu, laicu y federal cola máxima autonomía política pa cada territoriu" pero nel que se garantice la "corresponsabilidá y la solidaridá ente ciudadanos y comunidaes autónomes".

La coalición d'izquierdes socia del gobiernu asturianu reclamó la creación d'un noyu de competencies básiques d'Asturies que l'Estáu tien de respetar y otru de competencies esclusives nes que la llexislación básica del estáu sía un tope, mientres que no económico, IX-BA quier que l'alministración asturiana xestiones les prestaciones de la Seguridá Social calteniendo la caxa única estatal. Otres novedaes que propón IX-BA ye la creación d'una policía autonómica y la participación nos asuntos europeos apautando delegaciones del Gobiernu asturianu que faigan d'interlocutores directes colos órganos de gobiernu de la UE.

Ente les competencies nueves que se proponen dende IX-BA nel marcu de rellaciones col estáu ta'l que'l Gobiernu asturianu participe nel procesu de nomamientu de los maxistraos del Tribunal Constitucional y del Conseyu Xeneral del Poder Xudicial, neto que'l Gobiernu Asturianu pueda nomar representantes nel gobiernu d'instituciones como la Comisión Nacional del Mercáu de Valores (CNMV) o'l Bancu d'España.

Nel ámbitu institucional asturianu, IX-BA propón xubir de 45 a 60 el númberu d'escaños de la Xunta Xeneral, ello xunta otres dos reivindicaciones de vieyo d'IX como son que la cámara asturiana tenga capacidá de disolvese y convocar elecciones anticipaes o que se considere tol territoriu asturianu como circunscripción electoral única. IX-Ba pide tamién que se desanicie la condición de que la presidencia del Gobiernu asturianu tenga de llevala obligatoriamente ún parlamentariu y que se-yos permita a los diputaos votar en contra nuna sesión d'investidura, na qu'anguaño namás puen votar a favor o abstenese.

Iglesias declaró que con too ello, y especialmente cola definición d'Asturies como nacionalidá l'oxetivu d'IX nun ye'l d'entrar "nun debate nominalista" pero sí el de torgar que les distintes denominaciones que se dean les comunidaes autónomes xeneren "derechos diferentes ente los territorios". No tocante a los plazos y condiciones de reforma del estatutu, Iglesias tien pa elli que PP y PSOE nun van poder ponese d'alcuerdu pa pesllar la reforma del estatutu asturianu ensin la participación d'IX-BA. Inda más, anque'l PP asturianu pidiere dexar el debate hasta que se tramite l'estatuto catalán y que'l PSOE tampoco atalante la reforma como daqué que sía prioritario, IX-BA defende que ye agora'l momentu más afayadizu pa entamar la reforma del estatutu asturianu pa poder facelo en paralelo a la reforma del modelu d'estáu.