IX alvierte a la FSA qu'ensin oficialidá nun se garantiza que sobreviva la llingua

Les declaraciones que fixere'l secretariu xeneral de la FSA-PSOE Javier Fernández sobre la reforma del estatutu d'autonomía asturianu, del que dixo que podía tar remocicáu d'equí a la vuelta d'ún añu anque tampoco nun yera un asuntu que-y esmoleciere mayormente y sobre'l qu'apuntó que la oficialidá nun va entrar en cuantes que supón obligar a falar asturianu a los que nun quieren nun son lo que los sos socios en gobiernu queríen sentir, nun prestaron gota nes files de los sos socios de gobiernu d'Izquierda Xunida.

Asina, el coordinador xeneral d'Izquierda Xunida, Jesús Iglesias llamentó que Fernández anicie la reforma estatutaria ensin enfotu y denunció lo curtio de la reforma que pretenden facer los socialistes, mesmo nel terrén del autogobiernu - Fernández faló namás d'afondar en deles competencies- que no tocante a la llingua, sobre la qu'Iglesias alvirtió que cuerre riesgu de desaniciu cola política que defenden los socialistes, especialmente cola so llinia d'aporfiar pola non oficialidá del asturianu, que pa Iglesias ye'l meyor camín pa que l'asturianu nun se pierda.

Nún contestu más xeneral, el Coordinador Xeneral d'Izquierda Xunida, Jesús Iglesias camienta que "nun procede falar de que van facese cambeos forzaos por un clima de reformes que vien del ámbitu estatal" y qu'en cuenta d'ello "sedría preciso ver les necesidaes d'Asturies y qué reformes se precisen nel nuestru estatutu" pa nun caer nel "error de la fotocopia" Iglesias aclarió que nun se trata de "fotocopiar l'estatutu catalán" pero tampoco otros que nun nos valgan. Con too y con ello, Iglesias allegróse de que'l PSOE anuncie que la reforma estatutaria puea facese no que queda de llexislatura.