ITVASA niégase a cumplir la toponimia oficial

La empresa que xestiona la ITV n'Asturies, de participación pública y obligada a usala, "malinterpreta interesadamente l'articuláu de la Llei d'Usu", afirmen dende la XDLA.

Según esplica nun comunicáu la organización cívica, "una persona residente nun conceyu asturianu cola toponimia yá oficializada col decretu correspondiente publicáu nel BOPA, púnxose en contactu cola Xunta pola Defensa de la Llingua Asturiana (XDLA) pa denunciar l'actitú negativa d'ITVASA (Inspección Técnica de Vehículos de Asturias, SA) ante la llegalidá vixente en materia toponímica. Esti ciudadanu vio nel so llugar de residencia unos carteles de la ITV qu'incumplíen la toponimia oficial d'esi llugar", polo que "mandó una quexa a la empresa que xestiona la ITV"

Ana Eva Vilas, direutora de Certificaciones y Acreditaciones, respondió-y copiando l'artículu 5 de la Llei de Promoción y Usu del Bable/Asturianu:

Primeramente agradecerle el comentario que nos ha enviado, pero salvo error por nuestra parte, la LEY 1/1998, de 23 de marzo, de uso y promoción del bable/asturiano, en su artículo 5 del capítulo II establece

CAPÍTULO II Del uso del bable/asturiano

Artículo 5. Publicaciones.

1. Las publicaciones, impresos, modelos, folletos o anuncios institucionales podrán ser publicados indistintamente en castellano, bable/asturiano o en las dos lenguas; si hubieran de surtir efectos frente a terceros, deberán ser publicados obligatoriamente en castellano, sin perjuicio de que puedan serlo también en bable/asturiano.

La XDLA afirma que Vilas "paez confundir interesadamente la documentación escrito colos topónimos. Los Decretos d'oficialización publicaos nel BOPA dexen bien claro cuála ye la toponimia oficial ('Los topónimos así determinados tienen la consideración de denominaciones oficiales, sustituyendo a las anteriormente vigentes, si las hubiere'), independientemente de la llingua na que se ponga'l documentu". "Responsables de la Conseyería d'Educación y Cultura dixeron l'añu pasáu que la presión nun ye la vía más afayadiza. A ver si dan con esa vía, pero, mentanto, la nuestra obligación ye denunciar les illegalidaes públicamente. Desgraciadamente, tenemos otru casu más d'incumplimientu toponímicu, como los que podemos ver en BOPA o en nes más de les conseyeríes del Principáu, inclusive na propia d'Educación y Cultura", recuerden.