Israel aprueba un proyectu qu’obliga a xurar llealtá al Estáu xudíu

|

El Gobiernu israelí aprobó un polémicu proyectu d’enmienda presentáu pola ultraderecha qu’obliga a les persones non xudíes qu’aspiren a la nacionalidá israelí a xurar llealtá al “Estáu xudíu y democráticu d’Israel”.

Ventidós ministros aprobaron esta enmienda que tuvo los votos en contra de los cinco ministros del Partíu Llaborista y los tres ministros del Likud, formación derechista a la que pertenez el Primer Ministru Netanyahu.

“Toos aquellos que quieran convertise en ciudadanos israelinos naturalizaos deberán declarar que serán ciudadanos lleales del Estáu d’Israel como Estáu xudíu y democráticu”, esplicó enantes de la votación Netanyahu a los sos ministros. Pero pa que’l proyectu s’afite entá tien que sometese a trés votaciones nel Parlamentu, onde la coalición gubernamental tien una mayoría de 74 escaños d’un total de 120.

Crítiques de palestinos
El testu llevantó dures crítiques de la población palestina que vive nos Territorios de 1948, integraos nel Estáu d’Israel, que supón el 20% de la población. Consideren la propuesta racista y defendieron que l’oxetivu cimeru ye evitar que palestinos de Gaza y Cisjordania nun puean instalase n’Israel tres casase con residentes nesta zona con pasaporte del Estáu sionista.

De fechu, esta norma nun afectaría a quienes reclamen la nacionalidá israelí en base a la Llei del Retornu, que dexa que cualaquier persona nel mundu con al menos un güelu xudíu puea asitiase n’Israel y algamar la nacionalidá israelí.

Netanyahu respondió les crítiques argumentando que nadie pue da-yos “llecciones morales sobre democracia e ilustración” y espuso los escritos de Theador Herzl, ideólogu de sionismu y David ben Gurion, fundador del Estáu d’Israel, pa xustificar el “cálter xudíu, pero democráticu” del mismu. “Esta enmienda ye la basé del sionismu”, sorrayó’l primer ministru.

Más proyectos
Otramiente, el ministru israelí d’Interior, Eli Yishai, del partíu ultraortodoxu sefardi Shas, declarón que tien preparada otra llei pa quitar la nacionalidá a “traidores que collaboren con organizaciones terroristas como Hamas o Hizbulah”.
 

Contador Estadistiques