Ismael Gonzalez Arias presenta "El tiempu de Manolo"

L'escritor, xerente cultural y investigador de la historia de la música asturiana Ismael Mª González Arias va presenta esta tarde de vienres a les 8 na FNAC de Siero'l so llibru nuevu "El tiempu de Manolo" una autobiografía de la mocedá del autor asoleyada por Ediciones Ámbitu.

Ismael María González Arias fala nesta novela de la patria sigún la entendía Stendhal cuando dexó dicho: "La verdadera patria ye aquella na
qu'atopo más persones que se me paecen". D'esta manera "El tiempu de Manolo" que se presenta tamién como "un minuciosu relatu biográficu de la mocedá del autor, etapa na que tuvo
a bien entregase al disfrute plenu del placer" ye una obra que "descubre por primer vez los misteriosos detalles de la vida
d'un pueblu onde, como en tolos llaos, los habitantes valen muncho más polo que son que polo que paecen". L'amistá, l'amor, el sexu, les drogues y la
muerte fain, en resumides cuentes, d'ingredientes básicos nesti llibru del que s'asegura na presentación del mesmu "que nun tien nenguna intención moralizante pero sí una clara
vocación d'homenaxe, públicu y notoriu, a una forma de vivir que, en delles circunstancies, resulta la única posible"
.

Ismael Mª González Arias nació nel añ 1957. Estudió maxisteriu y trabayó un tiempu d'ayudante mineru na empresa Hunosa hasta convertise en profesor d’enseñanza primaria. Espertu en xestión cultural, imaxe y comunicación, y política llingüística, dirixó dende la so puesta en funcionamientu'l Centru Cultural Municipal Teodoro Cuesta de Mieres, dende’l qu’impulsó múltiples actividaes de promoción de la llingua y la cultura asturianes, ente elles el Premiu de Poesía Teodoro Cuesta, del que se celebra anguaño la so15ª edición. Trs d'una etapa como xefe de Gabinete de l’alcaldía d’Uviéu con Gabino de Lorenzo a mediaos de los 90, dexó esti cargu en 1996 pa volver al Centru Cultural de Mieres.

Ente la so obra diverso, siendo autor de diversos trabayos sobre llinguïstica y didáctica en revistes especializaes, rescamplen obres como'l manual escolar de llingua asturiana Fálame, fála–y, del que foi coautor. González Arias estrenóse como narrador cola novela "El cuartu negociu" ambientada na realidá de les repúbliques emerxentes de la antigua Xugoslavia, y cola qu’algamó’l Premiu Xosefa Xovellanos en 1992. A medies col so hermanu Xaime escribió un completu estudiu sobre "L’asturianada (ensayu sobre la vitalidá d’un xéneru)" col qu’algamaron el Premiu Fuertes Acevedo en 1998 y col qu'entamó González Arias una bona riestra de trabayos sobre temes musicales, ente ellos "Les cuarenta principales - Cancioneru popular de Mieres".

Columnista avezáu del diariu Les Noticies, débese-y tamién a Ismael González Arias la edición de El poder de les llárimes, col que se recuperaba al poeta escaecíu Laudelino León.


Pa conocer meyor a esti autor, nun dexamos d'encamentar la visita a la so web personal neto que na entrevista que-y fexo Inaciu Galán pa "Asina foi'l surdimientu"