Isabel Gutiérrez Novo gana’l XVI Concursu de Cuentos pola Oficialidá

La llanisca Isabel Gutiérrez Novo resultó ganadora del XVI Concursu de Cuentos pola Oficialidá del Asturianu gracies al testu ‘Hestories cruciaes’. El 12 de xunetu va recibir el premiu mientres un actu en Santuyano (Bimenes).

La escritora nacida en Llanes nel 1980 releva asina nel palmarés del concursu a Héctor Pérez Iglesias y recibe una recompensa de 600 euros. El propiu ganador del añu pasáu formó parte del xuráu nel que tamién participó Xulio Vixil Castañón, Nacho Fonseca Alonso, l’alcalde de Bimenes Alejandro Canteli Rozada y el téunicu responsable de la Estaya de Cultura, Daniel Cueli Canto. Éstos dos últimos fixeron les funciones de presidente y secretariu, de manera respeutiva.

El segundu clasificáu del XVI Concursu de Cuentos pola Oficialidá del Asturianu qu’entama’l Conceyu de Bimenes foi Pablo Rodríguez Medina (L’Entregu, 1978), con ‘Al serviciu de Cassius’, y el terceru, Raúl Castañón del Río (Uviéu, 1969), con ‘El camín de l’arcu la vieya’. Dambos van recibir 450 y 300 euros, de manera respeutiva. L’actu d’entrega de premios va tener llugar el vienres 12 de xunetu, a les 19.30 hores, mientres una Xornada Lliteraria na Casa la Cultura de Santuyano na que Gutiérrez Novo va lleer el cuentu ganador. Amás, aprovecharáse l’eventu pa presentar en Bimenes el númberu 11 de la revista lliteraria d’autores mozos Formientu, nel que participa la yerbata Blanca Inés Fernández Quintana.