Internet llega mal a l'Asturies rural

Pelos pueblos d'Asturies onde nun llega la cobertura de la rede convencional de Telefónica hai entovía cerca de 20.000 teléfonos tipu "TRAC" basaos en llinies telefóniques celulares que nun dexen entrar a la rede internet a los sos usuarios. Estes llinies, que foron un adelantu de la que se punxeron a primeros de los 90, taben condenaes a desapaecer por orde ministerial del añu 2.002 qu'obligaba a Telefónica a sustituyiles por otres llinies modernes al sostener la declaración gubernamental que l'accesu a Internet yera un "serviciu universal" idea que quedó afitada na criticada Llei De Servicios de la Sociedá de la Información y de Comerciu Electrónicu (LSSI) . A resultes d'ello abrióse un concursu al que se presentaron delles ufiertes pa la sustitución de les unidaes TRAC por otros sistemes que dexaren acceder a la rede. La fecha tope pa desaniciar el TRAC yera la del 31 d'avientu del 2004, pero'l procesu foi enguedeyándose y Telefónica y les compañíes que llevaben la contrata nun se poníen d'alcuerdu en qué tecnoloxía aplicar nin nes condiciones y plazos. Ello ye que cambiar estes llinies nun yera negociu pa les empreses particulares, anque los planes de desarrollu rural Proder y Feder aseguraben una financiación pa un procesu cada vegada más revesosu, mui criticáu por colectivos d'internautes y que foi espurriéndose nel tiempu hasta consumise'l plazu, fecha en la que, según asegura la Secretaría d'Estáu de Telecomunicaciones, Telefónica d'España comunicó-y yá la finalización, a fecha del 31 d'avientu del 2004, del plan d'espardimientu d'accesu funcional a internet en zones de TRAC.

Agora, conceyos como Cangas del Narcea tan recibiendo comunicación de la Viceconseyería de Presupuestos y Alministración Pública del Principáu na que s'esplica que los abonaos con teléfonos celulares TRAC que quieran disponer d'accesu a Internet han mandase ellos mesmos al serviciu d'atención al cliente de Telefónica d'España al traviés del númberu de teléfonu 1004 pa solicitar que-yos pongan accesu a internet. La sostitución de la llinia nun ye automática, y únicamente va facese a petición de cada interesáu, entamando dende'l momentu de la solicitú un procesu nel que pue facese llargu enforma. Telefónica tien la obligación d'atender les solicitúes nel plazu máximu de 60 díes, pudiendo los interesaos reclamá-y a la mesma empresa en casu de nun atendése-yos la solicitú nesi plazu. Telefónica dispón entós de trenta díes más enantes de que l'abonáu pueda poner una reclamación énte la Secretaría d'Estáu de Telecomunicaciones y pa la Sociedá de la Información. La solución técnica p'acceder a Internet va ser distinta en cada casu, pudiendo sustituyise'l TRAC poles llinies convencionales de par de cobre o por otres de tipu radioeléctricu GSM/GPRS, LMDS o satélite.

Nun fai falta dir mui lloñe del centru d'Asturies p'alcontrar pueblos qu'entovía dependen del TRAC. Parroquies como Llavandera o Caldones en Xixón tienen entovía les más de les sos llinies furníes al traviés del serviciu TRAC, y en conceyu de Gozón los vecinos de Podes reclamaron entovía la otra selmana que se cumpliere un alcuerdu esistente ente Telefónica y el conceyu pol que la empresa se comprometía a poner llinia telefónica convencional na parroquia enantes del 2005. La ñeve qu'esti mes de febreru dexó pueblos enteros incomunicaos y munchos cortes de corriente volvió a demostrar la debilidá d'estos aparatos TRAC que precisen de recargar les sos bateríes pa poder funcionar. El teléfonu móvil conviértese nel únicu preséu de comunicación pa munchos asturianos que viven en llugares onde nun hai más que'l teléfonu TRAC.

La Web de la Secretaría d'Estáu de Telecomunicaciones y Sociedá de la Información apurre información sobre la situación actual de sostitución de los teléfonos TRAC.