Internautes asturianos, contra'l canon de la SGAE

Asturies tamién ye escenariu de movimientos na rede contra'l pagu d'un canon a la SGAE pola compra d'un cd virxe.

Dende que se xeneralizó intercambiu d'archivos de música n'internet saltó la voz d'alarma nes más de les grandes discográfiques pol tema de los derechos d'autor, anque la verdadera revolución nel estáu español llegó cola xeneralización de la copia de CD's y col nomáu "top manta" nel que puen atopase copies piratiaes de les novedaes discográfiques a precios ente tres y cuatro vegaes más baratos que los que tien el discu "de verdá" nes tiendes. Esta de la copia de música ye una llarga guerra ente les discográfiques y los internautes que vivió la so primer batalla col pieslle de Napster, el primer serviciu universal d'intercambiu d'archivos na rede, y qu'agora vive un capítulu más cola apaición de nuevos formatos n'internet pal intercambiu d'archivos. Estes formes d'acceder a la música tan influenciaes en gran midida pola situación actual del mercáu musical, que xube los precios de los discos al empar que mengua la variedá y fondura del catálogu musical.

Nun marcu cambiante nel que'l mercáu tradicional del discu parez que yá nunca nun va ser otra vuelta como yera hasta l'apaición d'internet y de les grabadores de Cd's, la SGAE ta faciendo un esfuerzu enorme por caltener los esquemes tradicionales de difusión y distribución de la música. Asina, la Sociedá Xeneral d'Autores y Editores que primero presioní pa cobrar los derechos d'autor de los sos afiliaos y tamién entamó a pasa-yos recibu a los que nun son, casu de los chigres, ta metida agora nuna auténtica guerra llegale escontra la venta de cd's pirates..

Una de les acciones llegales más polémiques llevaes alantre pola SGAE ye'l cobru d'un canon pola compra d'un cd virxe. Esta tasa va aplicase d'agora en p'alantre y va cobrase sobre cada CD o DVD virxe independientemente del usu que se-y vaya dar. Ello ye, la tasa cóbrase lo mesmo si ye pa sacar una copia d'un discu de música que si ye pa grabar nelli les semeyes que sacamos nes vacaciones cola maquina de retratar dixital que tenemos acabante de comprar. La SGAE, según datos de l'Asociación d'Internautes, cuenta con ingresar 54,6 millones d'euros al traviés d'esta tasa, que tien más significaos aparte del económicu. Ello ye que, paradóxicamente, al aplicar esta tasa, la SGAE acepta implícitamente'l tener ingresos que vienen d'un negociu illegal como ye la venta de cd's pirates.

Ente esti panorama, n'Asturies, como en cualquier otra parte, un ampliu grupu d'autores y de consumidores de productos musicales mantienen una actitú crítica pa cola SGAE, a la qu'acusen de nun mirar namás pol porgüeyu propiu. Asina, una riestra d'internautes asturianos tan acabante d'estrenar una web onde quieren denunciar la implantación d'esti canon, amás de sirvir tamién de plataforma p'acceder a otres web's crítiques cola llexislación actual sobre derechos d'autor. Otramiente, nesta web podemos informanos d'una iniciativa pala circulación llibre de cd's. La iniciativa lleva'l nome de CD-Crossing, y consiste en dexar copies de cd's con conteníu de llibre difusión "abandonaos" nun llugar públicu de manera qu'otres persones los recueyan, los usen, y vuelvan a dexalos "abandonaos", nuna versión con música del famosu "book-crossing" una iniciativa d'intercambiu de llibros que ta funcionando mui bien en delles grandes ciudaes.