Innovación nel jazz ye la propuesta d'El Barucu

El local xixonés El Barucu de la C/Almacenes, qu'ufierta música en directo davezu, propón pa mañana xueves doce una sesión de jazz cola cantante belga Lynn Cassiers, que vien acompañada d'una banda formada por Rafael Morales col baxu lléctricu, Noly torres na batería y l'asturianu Cesar Latorre nel pianu, otru de los músicos asturianos de jazz qu'emigraron a Holanda pa completar los sos estudios musicales como Dudu Punte, Mapi Quintana o Carlos Pizarro.

La propuesta d'esta cantante ye bien innovadora, per un llau polos recursos de los qu'echa mano pa los directos, porque la so voz lleva distorsiones y efectos, y por l'amplitú del rexistru estilísticu del grupu que parte del jazz pero abeya otros estilos faciendo versiones de pop y de Rhythm & Blues. El conciertu va ser a les 21:30 hores y la entrada ye de baldre. Pero la música en directo nun acaba en Xixón con esti conciertu, porque amás del conciertu de Tuenda nel Trisquel, el grupu de rock Fargo toca nel tamién local xixonés Arizona a les 21:30 hores y tamién cola entrada de baldre.