Iniciativa tresllada a la FSA la conveniencia d'entamar a trabayar na reforma del Estatutu

Gimena Llamedo, la senadora María Fernández Álvarez y María Luz Pontón tuvieron un alcuentru telemáticu con representantes de la organización.

El presidente Iván Llera y el vocal de Rellaciones Institucionales, Inaciu Galán, treslladaron a les socialistes qu'anguaño se dan les circunstancies pa entamar a trabayar na reforma estatutaria nesta llexislatura, buscando siempre el máximu consensu posible ente les fuercies polítiques. "Nesta llexislatura podría dase l’aritmética parllamentaria n’Asturies y en Madrid pa l’aprobación d’un nuevu Estatutu cola oficialidá incluyida", considera Iniciativa pol Asturianu.

La secretaria d'Organización, la senadora y la secretaria d’Educación, Universidaes y Normalización Llingüística de la Federación Socialista Asturiana (FSA-PSOE), de manera respeutiva, sintieron con atención otres munches propuestes de Llera y Galán. Ente elles rescampló "la importancia de cuntar con un Plan de Normalización que faiga una programación del trabayu a realizar estos años na Dirección Xeneral de Política Llingüística".

Llera comentó delles midíes concretes dientro de la RTPA, como contar con una actitú sensible y favoratible al idioma que permita algamar espacios nuevos nel ente, y presencia del asturianu nos informativos, calcando sobre manera na cuestión del usu oral preferencial de los topónimos tradicionales oficializaos. Tamién comentó’l casu de RTVE y dixo que “sabemos que nun ye competencia del Gobiernu asturianu, pero taría bien que tuvieren contactos con ellos pa entamar a tener programación n’asturianu. Y podría entamase por un informativu en TVE y otru en RNE”.

Galán pidió axilizar el procesu pa cuntar col reglamentu d’usu del asturianu na Xunta Xeneral y siguir trabayando cola utilización de la imaxe corporativa billingüe en toles conseyeríes y na Presidencia del Gobiernu. Tamién se punxo enriba de la mesa delles midíes concretes pa Educación, como mantener y medrar les campañes de matriculación, el plan pilotu y la busca d'una solución a la especialidá docente y la presencia del asturianu na etapa d'Infantil.

Toponimia de playes, montes y puertos

Iniciativa pol Asturianu amosó los sos esmolecimientos nos pasos atrás na normalización daos nesta llexislatura, como ye'l casu de la toponimia, polo que pidieron a les socialistes un esfuerzu pa sacar alantre los decretos de los doce conceyos qu'entovía nun la tienen aprobada y la reclamación del emplegu de la yá oficializada a nivel estatal, como por exemplu nes carreteres. D'igual forma, pidieron la oficialización de los nomes tradicionales de les playes, montes y puertos.

Sobre l'usu del asturianu na FSA, animóse a tener presente a l’asturianu con normalidá na so páxina web y comunicaciones, en coherencia col so programa y defensa de la oficialidá. Pa terminar, dende la organización pidieron más pasos alantre na normalización y l’usu del asturianu en tolos niveles del Gobiernu y conceyos y punxeron l’exemplu de la campaña informativa nel andanciu del coronavirus pa llevalu a tola actividá gubernamental: “Fíxose un usu normal del asturianu y gracies a ello ganóse visibilidá y normalidá. Agora namás queda treslladar esa forma de trabayar al restu de les acciones del Gobiernu”, aseguraron.

Na imaxe, d'izquierda a derecha, y d'arriba a abaxo, Galán, Llamedo, Pontón, Llera y Fernández Álvarez.