Iniciativa reclama a PP y Foro "nun dar pasos atrás na normalización" nos conceyos que gobiernen

La organización pon el focu nel pautu con VOX en Xixón y nel de los populares con esta formación en Tinéu, "alcuerdos qu'atenten contra la Llei d'Usu y los avances algamaos".

"Ye inxustificable que PP y Foro acepten pasos atrás na presencia del idioma a nivel municipal. Ye incomprensible que Foro, que lleva la oficialidá nel programa, y el PP, qu’aprobó la Llei d’Usu del asturianu, claudiquen énte postures de marxinación hacia la llingua asturiana y tolerasen incumplimientos de la llexislación vixente en materia llingüística", reflexona Iniciativa pol Asturianu.

Sobre l'alcuerdu de gobiernu de Xixón ente los trés partíos de derecha recuerda que’l "Plenu del Conceyu impulsó en 2019 una declaración institucional en defensa de la Oficina de Normalización Llingüística que cuntó colos sofitos de PSOE, Foro, Xixón Sí Puede, Izquierda Xunida y Ciudadanos y que valió pa defender l’organismu de diferentes ataques que taba sufriendo. Nesti momentu, eses amenaces de pieslle y bloquéu de la Oficina de Normalización vuelven ser una realidá. Nin Foro nin PP han permitir cualesquier ataque a esi muérganu que ye una ferramienta necesaria y útil pa poner en marcha les midíes que señalen la Ordenanza y los planes de normalización". Nesi sen, la conceyala de Cultura, Ana Montserrat López Moro, confirmó a Asturies.com esta mañana que'l desaniciu del SNL yera ún de los oxetivos de VOX na negociación del pautu con Foro, “a lo que nos negamos”.

Mentes, en Tinéu, ún de les cuestiones del pautu ente PP y VOX ye recuperar el topónimu derogáu 'Tineo' p'arrequexar el tradicional y únicu oficial, lo que van solicitar cada trés meses al Gobiernu. "Iniciativa pol Asturianu considera inaceptable cualesquier pasu atrás na presencia de la llingua asturiana en Xixón, Tinéu o en cualesquier conceyu d’Asturies" por haber "una inmensa mayoría de la sociedá qu’apuesta por caltener los pasos daos y avanzar nel billingüismu, nel usu tresversal del idioma, asina como nel usu de la toponimia oficial".

Na semeya, material asoleyáu pola Oficina de Normalización Llingüística de Xixón.