Iniciativa pol Asturianu tien en marcha una campaña d’afiliación

Les persones que s’afilien a Iniciativa pol Asturianu enantes del Día de les Lletres Asturianes van recibir llibros de regalu. El coleutivu que trabaya pola normalización del idioma celebra asina la Selmana de les Lletres Asturianes.

Iniciativa pol Asturianu presenta dos opciones pa les persones que quieran collaborar cola organización: en primer llugar ta la figura del simpatizante, que paga 20 euros añales, y, en segundu, la del sociu, qu’ha d’abonar 60 euros. Asina, les persones qu’opten pela primer opción van recibir un llibru en llingua asturiana, mentes que los que se decidan per ser socios van tener como recompensa un llote de trés llibros. Los interesaos pueden ponese en contautu cola organización al traviés del corréu electrónicu contautu@iniciativapolasturianu.org.

Sicasí, el coleutivu cívicu nun se quier escaecer de los asociaos actuales y el vienres próximu, Día de les Lletres Asturianes, va sortiar ente tolos miembros un llote de llibros y revistes n’asturianu.