Iniciativa pol Asturianu propón cambios nel Códigu Éticu de la Universidá pa que les llingües nun sían elementos de discriminación

|
Comité d'Ética de la Universidá d’Uviéu

La Universidá d’Uviéu ta preparando’l Códigu Éticu de la institución, de calter voluntariu. El llunes zarróse’l plazu pa presentar observaciones y suxerencies al mesmu, lo qu’aprovechó Iniciativa pol Asturianu pa proponer cambios pa que les llingües nun sían elementos de discriminación y, al empar, protexer l’asturianu.

La primer propuesta al borrador, ellaboráu por un grupu d’espertos del Comité d'Ética de la Universidá d’Uviéu, refierse a la Parte II del artículu 5, qu’afita que “nel desendolcu de la docencia respetaránse los derechos del estudiantáu, ensin realizar discriminación dalguna por causa de relixón, etnia, sexu, identidá de xéneru y orientación sexual, clase social o cualesquier otra circunstancia personal o social”. Iniciativa pol Asturianu considera necesario incluyir nel testu que l’usu de cualesquier llingua, con especial antención a la llingua asturiana, tampoco sía motivu de discriminación dientro del espaciu académicu, amás d’introducir tamién esti esclaramientu na Parte III del artículu 4.

“La organización yá denuncio varies situaciones de discriminación llingüística, y tovía siguen llegando quexes pol usu llibre del asturianu dientro de la institución académica. Por ello ye importante qu’esti documentu recueya que l’espresase n’asturianu nun seya un motivu de discriminación nin xenere dificultaes dientro de la Universidá d’Uviéu”, apunta la organización nuna nota.

L’otru cambiu considera que se debería dar nel apartáu ‘Principiu y valores comunes’ pa recoyer una mención espresa al asturianu. Asina, propón que s’introduza’l testu “promoveráse’l respetu y la promoción de la diversidá llingüística en toles actividaes de la Universidá, con especial atención al cuidáu pa con los usuarios de la llingua asturiana, como llingua en situación de minorización protexía polos Estatutos d’esta institución”.

Por último, Iniciativa pol Asturianu plantega que’l testu final del Códigu Éticu, documentu que busca proporcionar un conxuntu de compromisos y conductes que pueda servir d’orientación pa los diferentes coleutivos de la Universidá d’Uviéu –personal d’alministración y servicios, personal docente y investigador, y estudiantáu– nel exerciciu de les sos funciones y nel disfrute de los sos derechos, s’asoleye nel BOPA, tanto en castellanu como n’asturianu.

Na semeya, xunta del Comité d'Ética de la Universidá d’Uviéu.

Contador Estadistiques