Iniciativa pol Asturianu propón a l'ALLA pa recibir una de les medayes d'Asturies

La organización felicita a la institución académica pol so cuarentenu aniversariu.

"L'Academia de la Llingua Asturiana cumple 40 años de funcionamientu. Nesti día, Iniciativa pol Asturianu quier reconocer el trabayu de los sos fundadores, de tolos presidentes y tolos y toles académiques que cola so formación intelectual ya entrega consiguieron qu’esti idioma tamién tuviese un espaciu pal estudiu, pa la conservación, pa la reivindicación y pa facer llegar al mundu la categoría que merez esta llingua", espresó ayeri Iniciativa pol Asturianu con motivu d'esta fecha. El 15 d’avientu del 1980, el Conseyu Rexonal d’Asturies, creaba al traviés del Decretu 33/1980 la tan demandada institución que s'ocuparía de tol llabor normativu de la llingua de les asturianes y asturianos.

Tamién, tres "felicitar a tolos miembros y trabayadores de la institución por llograr da-y prestixu al idioma", anunciaba la so intención de proponer al Gobiernu la concesión a l'Academia de la Llingua Asturiana (ALLA) d'una de les medayes d'Asturies, que se entregan con motivu del Día de la Nación Asturiana –esti añu nun se dieron por cuenta de la pandemia de COVID-19–. “Tenemos que cellebrar que 40 años dempués de la so creación ye una institución afitada, indiscutiblemente importante pal idioma, reconocida polos Gobiernos d’Asturies y d’España, y que ta faciendo un llabor académicu de la que los y les falantes tenemos que sentinos arguyosos. L’ésitu d’estos 40 años de trabayu tien que ser una allegría colectiva pa tolos y toles falantes d’asturianu y de gallego-asturianu", encamienta.

"L’ALLA ye la institución más importante pal idioma", sigue Iniciativa pol Asturianu, que celebra tamién la partida pa la institución asturiana nos Presupuestos Xenerales del Estáu, dalgo que venía reclamando esta organización dende la so fundación. "Queremos qu’esa noticia, una de les meyores pal idioma d’esti 2020, valga pa siguir trabayando en diferentes proyectos y xeres pa continuar ganando normalidá pal idioma y también pa consiguir que l’Academia de la Llingua Asturiana tenga la misma aportación estatal qu’el restu de les instituciones que trabayen poles diferentes llingües del Estáu", señala.

Na imaxe, la Brigada Central de Salvamentu Mineru recibe nel 2019 la medaya d'oru d'Asturies. Semaya obra d'Armando Álvarez.