Iniciativa pol Asturianu pide que l’usu del idioma tenga pesu na baremación de les convocatories del Gobiernu

|
Iván Llera medios

La convocatoria pública de subvenciones a les entidaes llocales espublizada la selmana pasada pa promover la realización de proyeutos de señalización turística lleva a Iniciativa pol Asturianu a insistir en que l’usu del asturianu tenga pesu na baremación de los concursos del Gobiernu. Critica que “nun facía nenguna referencia al asturianu o al usu de la toponimia tradicional de los llugares”.

“Resulta mui llamativo qu’esta ufierta na que nun ta presente esa importancia del asturianu na baremación de la puntuación venga precisamente de la Conseyería de Cultura, Política Llingüística y Turismu. Nun puede ser que pal área de Gobiernu que tien les competencies de política llingüística l’idioma nun tenga un papel importante”, añade Iván Llera, presidente del coleutivu. “Les bases de les sovenciones deben d’incluyir la puntuación del usu billingüe na rotulación y la obligación del usu de los topónimos tradicionales tal y como establez la Llei 1/98, de 23 de marzu, d'Usu y Promoción del Asturianu. Y non solamente les propies de la Conseyería de Cultura, tien que ser tresversal en tola acción de gobiernu. Otres campañes como los Planes Estratéxicos del Comerciu que dependen de la Conseyería d’Industria, Emplegu y Promoción Económica tamién tienen que favorecer esi usu normal del asturianu”, considera.

La convocatoria de Turismu tien como oxetivu “promover la realización de proyeutos de señalización turística que contribuyan a facilitar la movilidá del visitante nel territoriu”, pa lo que destina 50.000 euros en réxime de concurrencia competitiva. Les bases reguladores son les aprobaes por Resolución de 28 de mayu del 2019, pola entós Conseyería de Emplegu, Industria y Turismu, espublizada nel BOPA de 5 de xunu del 2019, que nun fai referencia nenguna al idioma.

Col mesmu costu

Llera reclama que “esti tipu de concursos públicos tamién tienen que tener presente l’usu normal del asturianu sobre manera en campañes que tienen muncha visualización. Amás, l’usu del asturianu en campañes como ésta nun implica un mayor gastu, col mesmu costu llogramos visibilizar l’idioma, da-y normalidá al usu de la llingua asturiana y cumplir la propia Llei d’Usu”.

Pa finar, el presidente d’Iniciativa pol Asturianu señala qu’el Gobiernu “tien que facer un esfuerciu y siguir dando pasos en toles conseyeríes pa facer normal l’usu del idioma en toles campañes entamaes dende l’Alministración”.

Na semeya, Llera.

Contador Estadistiques