Iniciativa pol Asturianu ofrezse a dar clase de Llingua Asturiana a parllamentarios na Xunta Xeneral

|

El coleutivu Iniciativa pol Asturianu entamó’l llunes una serie de conceyos colos grupos parllamentarios con una entrevista con Foro de Ciudadanos. Nella propunxo la posibilidá de dar un cursu d’asturianu a diputaos na Xunta Xeneral.

Carmen Sela Fernández foi la representante de Foro na reunión y mostróse, según pallabres d’Inaciu Galán, presidente d’Iniciativa pol Asturianu, “mui receptiva a los nuesos plantegamientos”. Asina, la diputada acoyó con satisfaición la posibilidá de que diputaos eleutos y demás personal de los grupos parllamentarios pudieran tener la posibilidá d’afondar nos sos conocimientos d’asturianu nel so mesmu llugar de trabayu.

“Foi un conceyu positivu”, señaló Galán que, sicasí, quier esperar a ver si les bona actitú de Sela na entrevista tien reflexu na política oficial del partíu. De momento, la diputada comprometióse a llevar toles propuestes d’Iniciativa pol Asturianu a la Comisión de Cultura de Foro de Ciudadanos que preside l’ex conseyeru Emilio Marcos Vallaure. Ente los munchos temes que se tocaron, destacaron les recomendaciones del Conseyu d’Europa recoyíes nel tercer informe sobre’l cumplimientu de la Carta Europea de Llingües Minoritaries y la necesidá de la oficialidá, asina como’l desendolque completu de la Llei de Promoción y Usu del Asturianu, aspeutu ésti últimu que recoyó la formación lliderada pol Francisco Álvarez-Cascos nel so programa eleutoral.

Ún de los puntos nos que más incidió Iniciativa pol Asturianu foi na necesidá de que la oposición faiga un control na política llingüística del Gobiernu, puntu nel que Sela nun descartó la posibilidá de solicitar la comparecencia de la conseyera Ana González pa qu’esponga cuáles son los planes del Executivu nesi tema. Nesi sen, tamién reclamó a Foro un mayor usu del asturianu, tanto na documentación oficial como de manera oral, treslladando la so sorpresa de ver a persones asturfalantes del partíu utilizando’l castellanu nes sos intervenciones públiques. Los problemes presupuestarios de l’Academia de la Llingua Asturiana (ALLA) y los incumplimientos de los decretos de toponimia foron otros de los temes trataos nel conceyu.

Más contautos

La reunión con Sela ye la primera d’una serie que’l coleutivu que trabaya pola normalización del idioma quier mantener colos grupos parllamentarios, asina como congresistes y senadores asturianos. Asina, mañana a les 11.15 hores na sede d’Izquierda Xunida n’Uviéu, va entrevistase con Jesús Iglesias, senador pola Xunta Xeneral en Madrid. “El Gobiernu d’España tamién tien responsabilidá política sobre l’asturianu”, esplica Galán, que tien la intención d’estudiar colos representantes eleutos asturianos les posibilidaes de trabayar pola llingua dende Madrid.

Tres esti conceyu, Iniciativa pol Asturianu espera concretar en feches próximes otru col grupu parllamentariu d’IX y con Gaspar Llamazares, asina como colos representantes de Foro en Madrid, el diputáu Enrique Álvarez Sostres y el senador Isidro Martínez Oblanca. Mentes, pese al pidimientu, nun tuvieron respuesta tovía del PSOE, PP y UPyD.

Na semeya, Carmen Sela y los representantes d’Iniciativa pol Asturianu, Inaciu Galán y Vítor Suárez.

 

Contador Estadistiques