Iniciativa pol Asturianu diseña cartelos con recomendaciones pa reducir los contaxos de coronavirus

|
Cartelu 'Nun toques' Iniciativa pol Asturianu

‘Llava les manes, manín’, ‘Nun toques güeyos, ñariz nin boca’ y ‘Agora la meyor maneresa de querese…, ye distanciase’ son dalgunos de los mensaxes de la campaña qu’entama Iniciativa pol Asturianu p'ayudar a reducir los contaxos de coronavirus. Éstos pueden descargase na web y nes redes sociales del coleutivu.

“Dende Iniciativa pol Asturianu queremos agabitar pa consiguir ente toes y toos reducir los riesgos del andanciu”, apunten. Poro ufren a la sociedá diez modelos diferentes “pa utilizar en redes sociales o pa emprentar y colgar en llugares públicos como comunidaes de vecinos, tiendes, gasolineres…”.

Los cartelos recueyen les normes xenerales que recomienden les autoridaes sanitaries. “Creemos que cuánto más información tengamos ye meyor pa toos y toes y ye necesario tamién ufiertar esa información n’asturianu pa da-yos más visibilidá a eses normes y tamién normalidá al idioma”, señalen.

Los cartelos tán disponibles pa la so descarga nes redes sociales d’Iniciativa pol Asturianu como Instagram (@iniciativaxast), Facebook (Iniciativa pol Asturianu), Twitter (@IniciativaxAst), asina como na páxina web de la organización. Diez diseños afayadizos pa facer llegar a familiares, collacios y compañeros de trabayu.

Contador Estadistiques